Íslandsmót skákfélaga - Pistlar liðsstjóra GM-Hellis

Fyrri hluti Íslandsmóts skákfélaga fór fram um nýliðna helgi. Hið ný sameinaða félag Skákfélagið GM-Hellir tefldi fram 9 keppnisliðum í mótinu, tveimur í 1. deild, einu í 2. deild og svo þremur liðum í 3 og 4. deild. Yfirliðsstjórn var í öruggum höndum þeirra Jóns Þorvaldssonar, Vigfúsar Vigfússonar og Hermanns Aðalsteinssonar og gekk öll skipulagning vel. Hér fyrir neðan eru birtir pistlar um mótið og skrifar Magnús Teitsson um 1 deild. Vigfús Vigfússon skrifar um 3. deildina og Hermann Aðalsteinsson skrifar pistil um 2. deild og 4. deild.

 

Stórmeistararnir Gawain Maroroa Jones, Robin Van Kampen og Þröstur Þórhallsson leiddu A-sveit GM-Hellis. 

 

Að kvöldi fimmtudagsins 10. október fór Íslandsmót taflfélaga af stað með nýju sniði, tíu liðum í efstu deild. GM Hellir tefldi fram tveimur sveitum og mættust þær í fyrstu umferð til að koma öllu samráði og hagsmunamiðuðum tilfærslum frá sem fyrst. Sem fyrr leiddi hinn geðþekki og nú nýgifti breski ofurstórmeistari Gawain Maroroa Jones A-sveitina og betri helmingurinn, Sue Maroroa Jones, styrkti B-sveitina. Gawain á hægri hönd var stórefnilegur prýðispiltur frá Hollandi, hinn tæplega nítján ára gamli Robin van Kampen. Úrslit í þessari viðureign voru að mestu leyti eftir bókinni; A-sveitin hafði sigur á öllum borðum nema því fimmta, þar sem hinn ólseigi Arngrímur Gunnhallsson náði jafntefli gegn Lenku Ptácníkovu í grimmúðlegri viðureign. Vert er líka að nefna viðureignina á áttunda borði, þar sem sóknarskákmennirnir Jóhanna Björg Jóhannsdóttir og Björn Þorsteinsson skiptust á sverðhöggum, en þar hafði reynslan sigur að þessu sinni eftir snarpa rimmu.

 

 

                 GM-Hellir -B 

 

Framvarðarsveit TR tuktaði hins vegar eigið B-lið með sama mun, og Bolvíkingar buðu Vinaskákfélagið velkomið í efstu deild með álíka skriðtæklingu, þannig að þrjú lið sátu á toppnum eftir fyrstu umferð. Næstir komu Vestmannaeyingar með sex punkta úr greipum Fjölnis og síðan Íslandsmeistarar Víkingaklúbbsins, sem höfðu unnið Skákfélag Akureyrar með fimm og hálfum vinningi gegn tveimur og hálfum.

Í annarri umferð bættust neðri deildirnar í hópinn og var öllu kunnuglegri bragur á því að tefla í stóra salnum í Rimaskóla en ekki hliðarsalnum frá því kvöldið áður, þar sem fótboltalandsleik Íslands og Kýpur var varpað á vegg í staðinn. A-sveitin gekk á undan með góðu fordæmi og vann afbragðs sigur á Taflfélagi Bolungarvíkur, fimm og hálfum vinningi gegn tveimur og hálfum. B-sveitin mætti Taflfélagi Vestmannaeyja og átti undir högg að sækja. Pálmi Pétursson vann hins vegar ágætan sigur á Sigurbirni Björnssyni, bóksalanum öfluga, og Hrannar Arnarsson hélt jöfnu gegn Þorsteini Þorsteinssyni. Á efsta borði stóð Lenka lengi vel til vinnings gegn hinum þrautreynda litháíska ofurstórmeistara Eduardas Rozentalis en hafði að lokum ekki erindi sem erfiði. Einn og hálfur vinningur var hins vegar viðunandi úrslit gegn sveit sem státaði af fjórum stórmeisturum og þremur FIDE-meisturum. Að umferðinni lokinni var A-sveitin á toppi deildarinnar með 13 vinninga en TV hálfum vinningi á eftir. B-sveitin var hins vegar á botninum með tvo vinninga eftir erfiða byrjun.

 

 

             Van Kampen, Jón Þ. Sue og Gawain.

 

Morgunstund gaf gull í mund á löngum laugardegi þegar A-sveitin vann 7-1 sigur á B-sveit Taflfélags Reykjavíkur, sem var svipuð úrslit og við var að búast miðað við styrkleika. B-sveitin dró þrjá vinninga í hús gegn Fjölni, en áhugavert er að bera saman samsetningu sveitanna í þessari viðureign. Heil 678 Elo-stig skildu að efsta og neðsta borð Fjölnis, meðan aðeins 191 stig var á milli sömu borða hjá jafnari sveit okkar fólks. Enda fór svo að neðstu borðin reyndust happadrýgst og Mátarnir Jón Árni Jónsson og fyrrnefndur Arngrímur hirtu heila punkta. Á meðan hrökk Víkingavélin í gang og flengdi Vinaskákfélagið 8-0, Skákfélag Akureyrar vann óvæntan 5-3 sigur á Taflfélagi Reykjavíkur og Eyjamenn höfðu Bola undir með minnsta mun. Okkar menn í A-sveitinni voru enn efstir en Víkingar einum og hálfum vinningi á eftir. B-sveitin var hins vegar í botnkraðaki með Vinaskákfélaginu og TR-b.

 

 

                Gunnar Björnsson var á 1. borði í C-sveit GM-Hellis.

 

Eftir síestuna settist A-liðið niður gegnt Íslandsmeisturunum í Víkingaklúbbnum og upphófst hörð rimma sem lauk með minnsta mögulega tapi. Sömu punktatölu náði B-liðið gegn Akureyringum í heldur friðsamlegri viðureign þar sem Baldur Kristinsson hafði betur gegn skákfrömuðinum valinkunna Stefáni Bergssyni, en hvorug úrslitin voru fjarri því sem búast mátti við fyrir fram. Vestmannaeyingar stukku í toppsætið með því að kjöldraga B-lið TR 7½-½ en A-lið TR lék Vinaskákfélagið jafn grátt. Bolvíkingar unnu síðan Fjölnismenn 5½-2½. Enn var allt í járnum á toppnum, við vinningi á eftir Eyjamönnum og Víkingar andandi ofan í hálsmálið á okkur hálfum vinningi neðar. Allt var hins vegar í framför í fallbaráttunni og bil að myndast á milli B-sveitarinnar annars vegar og Vina og TR-b hins vegar.

Á sunnudag mætti A-lið GM Hellis stórveldinu TR og marði minnsta mögulega sigur með góðum sigrum hjá van Kampen og Sigurði Daða. B-sveitin hafði þrjá vinninga af Bolvíkingum, þar sem Baldur Kristinsson vann aftur, nú gegn Magnúsi Pálma Örnólfssyni. Björn Þorsteinsson og Jón L. Árnason sættust á skiptan hlut, svo og Tómas Björnsson og Jón Viktor Gunnarsson. Einnig skildu Kristján Eðvarðsson og Bragi Þorfinnsson jafnir en á efsta borðinu mátti Magnús Teitsson játa sig sigraðan eftir tímahraksbarning gegn Jóhanni Hjartarsyni. Enn ein frambærileg úrslit hjá varaliðinu. Í fréttum var það annars helst þann dag að Víkingar og Eyjamenn skildu jafnir í þungavigtarslag, Akureyringar unnu Vinaskákfélagið 7-1 og Fjölnir sigraði TR-b með 6½ vinningi gegn 1½.

 

              A-sveit GM-Hellis gegn Víkingaklúbbnum. 

 

Að fimm umferðum loknum af níu er baráttan á toppnum æsispennandi. Taflfélag Vestmannaeyja hefur sýnt mikinn stöðugleika og er efst með 28½ vinning en A-sveit GM Hellis er aðeins hálfum vinningi þar á eftir. Víkingaklúbburinn kemur síðan næstur með 27 vinninga og virðist eiga léttari andstæðinga eftir, þannig að óráðlegt kann að vera að veðja á að nýir Íslandsmeistarar verði krýndir í vor. TR, TB og SA eru heldur ekki víðs fjarri en þurfa að gefa í til að komast í verðlaunasæti. Fjölnismenn úr Grafarvogi eru í einskismannslandi deildarinnar en B-sveit GM Hellis stendur vel að vígi til að bjarga sér frá falli nema Vinaskákfélagið og TR-b komi á óvart í síðari fjórum umferðunum í febrúarlok.

Gawain Jones sýndi enn og aftur hvílík mulningsvél hann er í þessari keppni, enda kann hann hvergi betur við sig en á Íslandi. Frammistaða upp á 2.796 stig og 4½ vinningar er ógnvekjandi árangur. Þá var Robin van Kampen fjalltraustur með fjóra vinninga. Árangur Einars Hjalta Jenssonar er einstaklega eftirtektarverður, en hann tefldi eins og 2.559 stiga maður og leyfði aðeins eitt jafntefli. Slík grimmd er til fyrirmyndar og sýnir hversu nautsterkur skákmaður Einar Hjalti er orðinn. Einnig átti Sigurður Daði stórgóða helgi og Kristján Eðvarðsson var afar stöðugur þrátt fyrir brokk milli A- og B-liða. Félagsmenn GM Hellis geta verið hæstánægðir með gengi liðanna tveggja í efstu deild en mörg stig eru enn eftir í pottinum og baráttan verður enn meira spennandi í vor. 

 

 
             D-sveit GM-Hellis.

2. deild

Þar sem Goðinn-Mátar og Hellir áttu samtals þrjú lið í 1. deildinni fyrir sameiningu og reglur leyfa ekki þrjú lið frá sama félagi í efstu deild varð það hlutskipti C-liðs GM-Hellis að tefla í 2. deildinni og tók Vinaskákfélagið laust sæti í 1. deild í staðinn. C-liðið tapaði 2-4 fyrir TV-B í 1. umferð og tapaði síðan stórt fyrir B-sveit Víkingaklúbbsins, ½-5½, í annarri umferð. Liðið fékk 1½ vinning gegn Skákfélagi Íslands í 3. umferð en náði jafntefli gegn Haukum í 4. umferð, 3-3. 

C-lið GM-Hellis er í neðsta sæti í 2. deildinni með 7 vinninga og þarf að ná hagstæðum úrslitum í seinni hlutanum til þess að falla ekki um deild. Vigfús Vigfússon og Arnaldur Loftsson náðu bestum árangri þeirra sem tefldu í C-liðinu og uppskáru 2½ vinning hvor fyrir C-liðið 

 

3. deild.

Skákfélagið GM Hellir var með þrjár sveitir í 3. deild að þessu sinni sem fengu heitin D, E og F. Við veltum því mikið fyrir okkur að senda sterka unglingasveit til leiks sem þeir Hilmir Freyr, Dawid, Felix, Heimir Páll, Óskar Víkingur og Alec Elías hefðu skipað. Sú sveit hefði teflt í fjórðu deildinni en við hættum við það þegar í ljós kom að F-sveitin í 3. deild hefði verið mun veikari en þessi unglingasveit og E-sveitin hefði verið sambærileg og þessi unglingasveit að styrkleika. Einnig hafði það áhrif að í 3. deildinni voru flestar sveitir vel skipaðar enda búið að fækka í deildinni um tvær sveitir frá árinu áður, þannig að hana skipuðu 14 sveitir. Þessir yngri félagsmenn fengju þá tækifæri til að tefla við sterka og reynda skákmenn í hverri viðureign.

 

             GM-Hellir E-sveit 

 

Þessi ákvörðun átti eftir að borga sig því þeir unglingar sem tefldu fyrir sveitirnar í 3. deild höluðu inn marga vinninga og eiga sinn þátt í að staða sveitanna er mun betri en búist var við. Fyrir fram reiknuðum við með að D-sveitin yrði fyrir ofan miðju, E-sveitin við miðju eða aðeins neðar og F-sveitin yrði í mikilli fallhættu. Sveitirnar eru nokkuð á svipuðu róli og reiknað var með fyrir utan það að F-sveitin er fyrir ofan E-sveitina, sem helgast að einhverju leyti af misjafnlega sterkum andstæðingum í sunnudagsumferðinni. Líklega jafnast það þegar líður á mótið.

D-sveitina skipuðu Hallgerður Helga Þorsteinsdóttir, Helgi Brynjarsson, Jóhanna Björg Jóhannsdóttir, Fumey Enyonam Sewa, Sigurður G. Daníelsson, Sigurður J. Gunnarsson, Jakob Sævar Sigurðsson, Snorri Þór Sigurðsson, Kristján Halldórsson, Óskar Maggason, Örn Stefánsson og Hilmir Freyr Heimisson.

E-sveitina skipuðu Snorri Þór Sigurðsson, Kristján Halldórsson, Óskar Maggason, Örn Stefánsson, Halldór Kárason, Elsa María Kristínardóttir, Hilmir Freyr Heimisson, Tómas Árni Jónsson, Smári Sigurðsson, Dawid Kolka, Jón Gunnar Jónsson, Benedikt Þorri Sigurjónsson, Kristófer Ómarsson, Gunnar Nikulásson og Sigurður Freyr Jónatansson.

F-sveitina skipuðu Smári Sigurðsson, Dawid Kolka, Kristófer Ómarsson, Gunnar Nikulásson, Sigurður Freyr Jónatansson, Felix Steinþórsson, Heimir Páll Ragnarsson, Jón Eggert Hallsson, Haraldur Magnússon, Ævar Ákason, Hermann Aðalsteinsson og Óskar Víkingur Davíðsson.

 

 

             GM-Hellir F-sveit 

 

4. deild. 
GM-Hellir tefldi fram þremur liðum í 4. deildinni; G-liði og svo Unglingaliði A og B. G-liðið átti erfitt uppdráttar til að byrja með og tapaði stórt fyrir B-liði Reykjanesbæjar ½-5½. G-liðið tapaði einnig stórt fyrir TR-unglingasveit B í annarri umferð. G-liðið fékk svo okkar eigin unglingasveit B í þriðju umferð og vann örugglega 5½-½ og vann svo 6-0 sigur á B-sveit skákdeildar Hauka. Staða G-liðsins í 4. deildinni er ágæt. Liðið er í 9. sæti með 4 punkta og 13 vinninga en mun líklega ekki blanda sér í toppbaráttuna að þessu sinni. Óskar Víkingur Davíðsson stóð sig best í G-liðinu og fékk 2½ vinning úr þremur skákum.

 

 

              GM-Hellir G-sveit teflir við Unglingasveit B 

Unglingalið A tapaði fyrir B-sveit Vinaskákfélagsins í 1. umferð 1½-4½. Gerði svo jafntefli við Skákdeild Hauka-B í annarri umferð. Liðið tapaði 0-6 fyrir D-liði Víkingaklúbbsins í 3. umferð og mætti svo hinu unglingaliðinu okkar í 4. umferð og vann nauman sigur 3½-2½. Liðið er í 12. sæti með 8 vinninga. Brynjar Haraldsson náði tveim vinningum úr 4 skákum og Sindri Snær Kristófersson fékk 1½ vinning.

 

              Unglingasveitir GM-Hellis, A og B mættust í 4. umferð. 

Unglingalið-B var eingöngu skipað unglingum úr Þingeyjarsýslu og var þetta í fyrsta sinn sem liðsmenn sveitarinnar taka þátt í Íslandsmóti skákfélaga. Fyrir fram var ekki búist við stórum afrekum hjá liðinu en það var þó ekki „núllað út“ í neinni viðureign. Liðið náði hálfum vinningi gegn Mosfellsbæ í 1. umferð og í annarri umferð náðist einn vinningur gegn B-liði SSON, þar sem Bjarni Jón Kristjánsson gerði sér lítið fyrir og vann Ingibjörgu Eddu Birgisdóttur á fyrsta borði með glæsilegum hætti. Unglingaliðið náði svo ½ vinningi gegn G-liðinu okkar og 2½ vinningi gegn unglingaliði A, eins og áður segir. Liðið er sem stendur neðst í 4. deildinni með 4½ vinning. Eyþór Kári Ingólfsson fékk 1½ vinning og þeir Bjarni Jón og Helgi James Þórarinsson fengu einn vinning hvor. 

 

           Vigfús Vigfússon Omar Salama yfirmótsstjóri og Viðar Njáll Hákonarson.

Nokkrir eftirmálar urðu af fyrri hluta Íslandsmótsins, sem ekki sér fyrir endan á, því alls bárust okkur 11 kærur vegna meintrar ólöglegrar uppstillingar á sameiginlegu liði GM-Hellis. Mótsstjórn ÍS vísaði þeim öllum frá í vikunni en þremur þeirra var vísað til dómstóls Skáksambandssins.

Þegar þetta er skrifað hefur dómstóll SÍ ekki skilað af sér niðurstöðu.  Niðurstöðu er að vænta á næstu dögum.  

Formaður og varaformaður GM-Hellis þakkar öllum þeim skákmönnum sem tefldu fyrir GM-Helli í fyrri hluta Íslandsmótsins kærlega fyrir og vonast eftir því að sjá þá alla í seinni hlutanum í Hörpu. 

Pistill formanns.

Þá er fyrri hluta Íslandsmóts skákfélaga lokið og menn búnir að tefla nægju sína amk. í bili.
Eins og fram hefur komið er Jón Þorvaldsson búinn að gera frammistöðu A-liðs Goðans góð skil eins og honum einum er lagið.  Í þessum pistli verður fjallað um B og C-lið Goðans. 

Annað árið í röð sendir Goðinn þrjú lið til keppni á mótið. B og C-liðin tóku þátt í 4. deild og er staða B-liðsins vænleg eftir fyrri hlutann. Liðið er sem stendur í 4. sæti með 17 vinninga og 6 punkta ásamt Fjölni B.

B-sveitin byrjaðið vel með 4,5- 1,5 sigri á SSON-B í 1. umferð.
Í 2. umferð vann B-liði C-lið Goðans 6-0
Í 3. umferð tapaði B-liði fyrir B-sveit SFÍ 2-4 og 
Í 4. umferð vann B-liðið D-sveit SA 4,5-1,5

Smári Sigurðsson stóð sig best í b-liðinu. Smári landaði 3,5 vinningum í 4 skákum.
Páll Ágúst Jónsson og Stephen Jablon fengu 3 vinninga af 4 mögulegum og Jakob Sævar Sigurðsson fékk 2,5 af 4 mögulegum. Benedikt Þorri Sigurjónsson fékk 2,5 vinninga en hann tefldi eina skák með C-liðinu. Baldur Danílesson kom inn í liðið eftir langa fjarveru og gerði jafntefli í báðum sínum skákum. Tómas Björnsson og Björn Þorsteinsson tefldu eina skák með B-liðinu.

Staða efstu liða í 4. deild. 

Rk.	SNo	Team	Games	+	=	-	TB1	TB2	TB3
1	19	SFí B	4	4	0	0	8	18.5	0
2	21	Mátar B	4	3	1	0	7	16.0	0
3	4	SSA	4	3	0	1	6	17.5	0
4	6	Goðinn B	4	3	0	1	6	17.0	0
5	5	Fjölnir B	4	3	0	1	6	17.0

C-liðinu gekk frekar brösulega í mótinu, en landaði þó naumum sigri geng C-sveit Fjölnis í fyrstu umferð 3,5-2,5. Liðið tapaði hinum þremur viðureignunum, eins og fram hefur komið 0-6 fyrir B-liðinu og svo tapaðist viðureignin við SA-D 2,5-3,5 og við TR-F 2-4.
C-liðið er í næst neðsta sæti í 4. deild, með 2 punkta og 8 vinninga.

Snorri Hallgrímsson og Valur Heiðar Einarsson stóðu sig best í C-liðinu. Báðir lönduðu þeir tveimur vinningum úr fjórum skákum. Hlynur Snær Viðarsson fékk 1,5 vinning úr þremur skákum.
Aðrir liðsmenn C-liðsins voru með innanvið 50% vinningshlutfall. 

Ljóst er að bæði lið eiga talsvert inni fyrir seinni hlutann og eru menn örugglega staðráðnir í því að gera betur á Selfossi í mars 2012.

Mótið á Chess-results:
http://chess-results.com/tnr57498.aspx?art=61&fed=Go%F0inn%20C&lan=1&fedb=NED&flag=30 

A-sveit Goðans kominn með annan fótinn í 1. deild.

A-sveit Goðans tapaði naumlega fyrir Víkingaklúbbnum A í 4. umferð sem tefld var í dag. Leikar fóru 3,5 -2,5 fyrir Víkingaklúbbnum.  Sigurður Daði gerði jafntefli við stórmeistarann Luis Galego á fyrsta borði. Ásgeir vann glæsilegan sigur með svörtu á De Jong Jan-Willem (2424) og Hlíðar Þór Hreinsson og Þröstur Árnason gerðu jafntefli. Einar Hjalti Jensson og Kristján Eðvarðsson töpuðu sínum skákum fyrir stigahærri andstæðingum. Frábær frammistaða hjá A-liðinu því andstæðingarnir voru stigahærri á öllum borðum.

Rk.	Team	1	2	3	4	5	6	7	8	TB1	TB2	TB3
1	Víkingaklúbburinn A	*	3½	5½	4½				6	19.5	8	0
2	Goðinn A	2½	*			5	5½	5½		18.5	6	0
3	KR A	½		*	4	3	4			11.5	5	0
4	TR B	1½		2	*			4½	3	11.0	3	0
5	SR A		1	3		*	3		3	10.0	3	0
6	TA		½	2		3	*	4		9.5	3	0
7	Hellir B		½		1½		2	*	4	8.0	2	2
8	Haukar A	0			3	3		2	*	8.0	2	0

Víkingaklúbburinn er efstur í 2. deild og hefur eins vinnings forskot á Goðann. Liðin eru langefst í 2. deild og hefur Goðinn 7 vinninga forskot á KR-b í 3. sæti. Margt þarf að fara úrskeiðis til þess að Goðinn vinni ekki sæti í fyrstu deild að ári.

B og C-sveit Goðans áttust við í gær. B-sveitin vann öruggan 6-0 sigur. 

B-sveit Goðans og er í ágætri stöðu í 4. deild. Liðið er í 4. sæti með 6 punkta og 17 vinninga. Þrjú efstu liðin vinna sig upp í 3. deild og eru góðar líkur á að það takist í seinni hlutanum á Selfossi í mars 2012.

Rk.	SNo	Team	Games	+	=	-	TB1	TB2	TB3
1	19	SFí B	4	4	0	0	8	18.5	0
2	21	Mátar B	4	3	1	0	7	16.0	0
3	4	SSA	4	3	0	1	6	17.5	0
4	6	Goðinn B	4	3	0	1	6	17.0	0
5	5	Fjölnir B	4	3	0	1	6	17.0	0
6	13	Bridge-fjelagið	4	3	0	1	6	15.0	0
7	15	UMSB	4	3	0	1	6	13.0	0
8	7	TR C	4	2	1	1	5	15.5	0
9	8	Víkingaklúbburinn - Þróttur C	4	2	0	2	4	13.0	0
10	11	Tf. Mosfellsbæjar	4	2	0	2	4	12.0	0
11	17	Sf. Vinjar B	4	2	0	2	4	11.5	0
12	14	SA D	4	2	0	2	4	11.0	0
13	1	Kórdrengirnir	4	2	0	2	4	10.5	0
14	3	TR F	4	2	0	2	4	7.5	0
15	9	TR D	4	1	1	2	3	11.5	0
16	10	Fjölnir C	4	1	0	3	2	11.0	0
17	18	Hellir Unglingar A	4	1	0	3	2	8.5	0
18	16	SSON B	4	1	0	3	2	8.0	0
19	12	TR E	4	1	0	3	2	8.0	0
20	20	Goðinn C	4	1	0	3	2	8.0	0
21	2	TG C	4	0	1	3	1	6.0	0

C-liðinu gekk frekar illa í mótinu og er sem stendur í næst neðasta sæti með 2 punkta og 8 vinninga.

Pistlar frá liðsstjórum eru væntanlegir á næstu dögum.

Chess-results
http://chess-results.com/tnr57496.aspx?art=0&lan=1&fedb=NED&flag=30

Allar sveitir Goðans unnu í 1. umferð

Allar skáksveitir Goðans unnu í fyrstu umferð á Íslandsmóti skákfélaga í gærkvöld.

C sveitin vann C sveit Fjölnis 3,5 - 2,5. Valur og Snorri unnu sínar skákir, Hlynur, Bjössi og Sighvatur gerðu jafntefli, en Hermann tapaði.

B sveitin vann SSON B 4,5 - 1,5. Páll, Jakob, Smári og Benedikt unnu, Baldur gerði jafntefli, en Stephen tapaði. 

A sveitin vann stóran sigur á B sveit Hellis 5,5  -0,5. Björn, Tómas, Þröstur, Kristján og Sigurður Daði unnu sínar skákir og Einar Hjalti gerði jafntefli.

Chess-results. 2. deild
http://chess-results.com/tnr57496.aspx?art=0&lan=1&flag=30

4. deild
http://chess-results.com/tnr57498.aspx?art=2&rd=2&lan=1&flag=30

Svo skemmtlega vill til að B-sveit Goðans mætir C-sveitinni í 2. umferð í dag.

Goðmögnuð framganga á lokaspretti.- Íslandsmót skákfélaga. Liðsstjóra pistlar.

Þá eru liðsstjórapistlar vegna Íslandsmóts skákfélaga klárirog eru birtir hér fyrir neðan. Jón Þorvaldsson skrifar pistil fyrir A-liðið en Hermann Aðalsteinsson skrifar pistil fyrir B og C-liðið.

Goðinn A gegn SA-b. Ásgeir, Einar, Þröstur, Björn, Tómas og Jón Þ stendur th. á myndinni.

Goðmögnuð framganga á lokaspretti

Helgin 4. - 5 . okt. var góð skemmtan fyrir þau hundruð skákmanna og áhorfenda sem lögðu leið sína í Rimaskóla. Hin vörpulega A-sveit Goðans lagði allt í sölurnar til að ná öðru af tveimur efstu sætum í þriðju deildinni.  Það takmark náðist með tilþrifum þó að tæpt stæði á stundum. Þannig komust skutilsveinar Hermanns formanns skör hærra í virðingarstiga skáklistarinnar og geta borið höfuðið hátt fram á haust komanda þar sem hin rómaða keppnisharka í 2. deild gín við görpunum.

Handleiðsla og ungverskt gúllas

Enn hafði Goðanum bæst liðsstyrkur því að kempurnar Kristján Eðvarðsson, tölvuséní,  og Þröstur Árnason, fyrrum Evrópumeistari unglinga, höfðu gengið til liðs við félagið þingeyska og munaði um minna. Vandað var til undirbúnings, jafnt huglægt sem líkamlega. Höfðu keppendur æft saman um nokkurra vikna skeið undir traustri handleiðslu þjálfara liðsins, Einars Hjalta, þar sem dýpri rök skáklistarinnar voru brotin til mergjar. Einnig kom sér vel að Goðinn tefldi æfingaeinvígi við Taflfélag Reykjavíkur viku fyrir mót í boði veitingamannsins geðþekka, Torfa Leóssonar. Torfi bætti um betur með því að kenna nokkrum af keppendum Goðans undirstöðuatriði hugleiðslu, undir kjörorðinu: „Goðar verða líka að rækta Garðinn sinn.“  

Þröstur Árnason mætti til leiks eftir langa fjarveru frá skákborðinu.

Lokahnykkur undirbúningsins var svo föstudagssíðdegið 4. okt.  þegar liðsmenn Goðans úr öllum þremur sveitunum hittust yfir léttum málsverði, nánar tiltekið ungverskri  gúllassúpu. Svo skemmtilega vildi til að uppskriftina að súpunni bragðmiklu mátti rekja til forföður ungverska stórmeistarans og Íslandsvinarins Laos Portisch, sem er annálaður matmaður og hungrar í fleira en eitruð peð. Það var glatt í Hafnarfirðinum þessa síðdegisstund. Menn eggjuðu hver annan lögeggjan með tilheyrandi vopnaglamri, veinan og gaulan. Þótti formanninum,  Hermanni Aðalsteinssyni, nóg um og minnti liðsmenn á að ekki væri nóg að hrútar skækju hornin fyrir bardaga. Þeim þyrfti líka að beita af kunnáttu og afli þannig að undir tæki í fjöllunum.  

Dregur til tíðinda  

Viðureignin á föstudagskvöldið var gegn sterkri sveit Akureyringa sem var jöfn Goðanum að stigum. Ásgeir, Björn og Tómas unnu sínar skákir en Einar Hjalti, Þröstur og Jón gerðu jafntefli. Niðurstaðan: Goðinn 4,5 - SA 1,5.

Þó að spennan væri ærin fyrir mótið, jók það enn á eftirvæntinguna að ekki var ljóst hvort Kristján Eðvarðsson gæti teflt með á laugardeginum því hann þreytti próf í Niðurlöndum á föstudeginum og ekki réðst fyrr en á síðustu stundu hvort hann næði kvöldfluginu til Keflavíkur. Kristján komst sem betur fer í tæka tíð og viðureignin við Vestmannaeyingana knáu á laugardagsmorgni var kynngimögnuð. Þó svo að sveit Goðans væri sterkari á pappírnum, börðust Eyjamenn eins og ljón og niðurstaðan varð jafntefli á öllum borðum: 3-3.

Kristján Eðvarðsson mætti til leiks í 6 og 7. umferð.

Víkingasveitin hafði þegar hér var komið sögu tryggt sér efsta sætið í 3. deild með 11 stigum og góðu vinningshlutfalli, hafði ekki tapað stigi nema gegn Goðanum. Jafnar fyrir síðustu umferð með 9 stig voru sveitir TV B með 23 vinninga, Goðinn með 22,5 vinninga og TG með 22 vinninga. Sveitir TV B og TG mættust í lokaumferðinni og skildu jafnar en Goðar öttu kappi við C-sveit Hellis sem allt í einu var orðin miklu öflugri en gegn Víkingasveitinni í umferðinni á undan. Koma enda á daginn að Hellisbúar höfðu allt annað í huga en að renna rauðum dregli undir skrúðgöngu Goðanna upp í 2. deild. Viðureignin hófst með miklu vopnaskaki og þung högg féllu en svo fór að lokum að beittir brandar Goða reyndust máttugri vopn en höggþungar kylfur Hellisbúa. Einstök úrslit urðu þau að  Ásgeir hneppti erkibiskup Gunnars formanns í herkví á 1. borði og varð formaðurinn að játa sig sigraðan. Á öðru borði varð jafnt milli Kristjáns Eðvarðssonar og Bjarna Jens Kristinssonar í hróksendatafli sem var svo spennandi að bægja varð viðkvæmum sálum frá borðinu. Á þriðja borði tefldi Einar Hjalti léttleikandi sóknarskák þar sem hróksfórn á g-7 kom eins og skrattinn úr sauðarleggnum og braut á bak aftur varnir Gísla Hólmars Jóhannessonar.  Á fjórða borði stóð skákdrottingin efnilega, Hallgerður Þorsteinsdóttir, sig frábærlega gegn okkar manni, Þresti Árnasyni, sem varð að seilast djúpt í reynslubankann til að snúa erfiðu tafli sér í vil og knýja fram glæstan sigur. Björn Þorsteinsson lenti í óvenjulegu afbrigði spánska leiksins gegn Helga Brynjarssyni á 5. borði. Staðan var lengi tvísýn en svo fór að lokum að Helgi féll á tíma vígmóður en Björn lét sér hvergi bregða í öllum hamaganginum með sínu ljúfmannlega glotti. Á 6. borði velgdi Patrekur Maron Magnússon okkar manni, Tómasi Björnssyni, vel undir uggum og stóð um tíma mun betur en Tómas nýtti sér ónákvæmni andstæðingsins í flókinni stöðu, spýtti í lófana og neytti aflsmunar.  Niðurstaðan varð því stórsigur Goðans, 5,5 vinningar gegn 0,5, á sprækum Hellisbúum sem eiga hrós skilið fyrir að tefla nútímalega þó svo að þeir geri það undir merkjum steinaldarmanna.

Öflug liðsheild

Frammistaða allra liðsmanna Goðans var með ágætum og framganga þeirra sem bestum árangri náðu ekkert annað en stórglæsileg. Liðið tapaði ekki viðureign og enginn keppenda tapaði skák í síðari hluta mótsins. Félaginu er mikill fengur í komu Kristjáns og Þrastar í félagið en Þröstur hafði ekki keppt á mótum um langt árabil og Kristján dregið nokkuð úr taflmennsku.  Óhætt er að fullyrða að sveit Goðans hafi nú skipað sér á bekk með öflugustu keppnissveitum sem eingöngu eru skipaðar Íslendingum. Geta liðsmenn og velunnarar Goðans því hlakkað til spennandi viðureigna í 2. deild  2011 - 2012

Árangur liðsmanna Goðans í 5-7 umferð

1.       borð Ásgeir P. Ásbjörnsson        2,5 v. af 3   (6,0 af 7)

2.       borð Kristján Eðvarðsson            1,0 v. af 2   (1,0 af 2)

3.       borð Einar Hjalti Jensson             2, 0 v. af 3  (5,0 af 7)

4.       borð Þröstur Árnason                   2,0 v. af 3   (2,0 af 3)

5.       borð Björn Þorsteinsson             2,5 v. af 3   (6,0 af 7)

6.       borð Tómas Björnsson                 2,5 v. af 3   (5,5 af 7)

7.       borð Jón Þorvaldsson                   0,5 v. af 1   (1,5 af 3)      

Goðinn óskar  hinum vígreifu og vöðvastæltu liðsmönnum Víkingasveitarinnar til hamingju með sigurinn í 3. deild og hlakkar til að takast á við þá á nýjum vettvangi. Öllum keppendum og keppinautum Goðans er þökkuð vaskleg framganga, drengileg keppni og skemmtileg viðkynni. Jafnframt er ástæða er til að þakka forseta Skásambands Íslands, Gunnari Björnssyni, mótsstjórn, skákdómurum og öðrum starfsmönnum mótsins fyrir góða skipulagningu og þá miklu vinnu sem þarf til að hið fjölmenna Íslandsmót skákfélaga gangi snurðulaust fyrir sig. Þá er sérstök ástæða til að þakka Helga Árnasyni, skólastjóra Rimaskóla, fyrir að leggja skákmönnum til prýðilega aðstöðu og að skipuleggja sölu ljúffengra veitinga með sínum háttvísu nemendum.  

Deildakeppnin er meðal helstu kennileita íslensks skáklífs. Það er von okkar Goðanna að þessi merka keppni megi skjóta enn dýpri  rótum og kveikja nýja frjóanga áhuga og iðkunar.
Jón Þorvaldsson.

B-lið Goðans. Sigurður Jón, Páll Ágúst, Sveinn, Rúnar, Jakob og Smári.

Árangur B-liðs Goðans.

5. umferð. Goðinn B - Æsir (félag eldriborgara)
Stórsigur vannst á Æsi 5,5-0,5. Smári, Jakob, Rúnar, Sveinn og Sigurður Jón unnu sínar skákir og Páll Ágúst gerði jafntefli. Öruggur sigur og einmitt það sem þurfti til að koma liðinu í gang.

6. umferð.  Goðinn B - Kórdrengirnir.
Mjög undarleg pörun. Lið kórdrengjanna var langt fyrir neðan B-liðið eins og staðan var þá og hefði verið eðlilegra að C-liðið hefði fengið þá. En hvað um það. B-liðið vann aftur stóran 6-0 sigur.
Sigurður Jón, Páll, Sveinn, Rúnar og Jakob unnu og Smári fékk ekki andstæðing.

Páll Ágúst Jónsson tefldi sínar fyrstu skákir fyrir Goðann á mótinu.

7. umferð.  Goðinn B - Víkingaklúbburinn B
Ljóst var að B-liði varð að vinna síðustu viðureignina til að eiga möguleika á að ná 3. sætinu. Best hefði verið að fá Austfirðinga, því sigur gegn þeim hefði tryggt þriðja sætið í deildinni, því þá hefðu önnur úrslit ekki haft nein áhrif á stöðu B-liðsins. En pörunin var okkur óhagstæð og Víkingaklúbburinn - B var niðurstaðan. Sú viðureign tapaðist 2-4. Páll Ágúst, Sveinn, Jakob og Smári gerðu jafntefli en Rúnar og Sigurður Jón töpuðu. Þar með var ljóst að B-liðinu tækist ekki að vinna sæti í 3. deildinni að ári og varð 8. sætið niðurstaðan og það þrátt fyrir að B-liði fengi næst flesta vinninga allra liða í 4. deildinni, heila 28 vinninga. Frekar súrt það.

C-lið Goðans. Sighvatur, Snorri, Bjössi, Valur og Hlynur.

Árangur C-liðs Goðans.

5. umferð. Goðinn C - Fjölnir C.
Góður sigur vannst á Fjölni C 4-2. Valur, Snorri, Sighvatur og Benedikt Þorri unnu sínar skákir en Bjössi og Hlynur töpuðu.

6. umferð.  Goðinn C - SFÍ
C-liðið tapaði stórt fyrir Skákfélagi Íslands 0-6. Ekki var við öðru að búast, enda liðsmenn SFÍ allir mikil stigahærri en okkar menn. Stigamunurinn var 800 til rúmlega 900 stig þar sem hann var mestur á efstu þremur borðunum. Hermann stóð þó lengi í Sigurði Daða Sigfússyni (2334) en Hermann lék skákinni niður í 35. leik. Eins stóð Sighvatur lengi í Erni Leó Jóhannssyni (1820).
Hermann, Sighvatur, Snorri, Bjössi, Valur og Hlynur tefldu gegn SFÍ.

7. umferð. Goðinn - C  SA-d
C-liðið tapaði naumlega fyrir SA-d 2.5 - 3.5. Hlynur vann sína skák, Snorri, Bjössi og Sighvatur gerðu jafntefli en Hermann og Valur töpuðu.
C-liði endaði því í 15. sæti með 19 vinninga sem er framar vonum. Snorri, Valur og Hlynur voru að taka þátt í Íslandsmóti skákfélaga í fyrsta skipti og stóðu sig vel.

Árangur einstakra félagsmanna.

Sigurður Jón Gunnarsson      2 af 3

Páll Ágúst Jónsson                2 af 3

Sveinn Arnarson                   2,5 af 3

Rúnar Ísleifsson                    2 af 3

Jakob Sævar Sigurðsson       2,5 af 3

Smári Sigurðsson                   2,5 af 3
             
Benedikt Þorri Sigurjónsson   1 af 1

Hermann Aðalsteinsson         0 af 2

Sighvatur karlsson                 1,5 af 3

Snorri Hallgrímsson                1,5 af 3

Sigurbjörn Ásmundsson         0,5 af 3

Valur Heiðar Einarsson           1 af 3

Hlynur Snær Viðarsson            1 af 3

Hermann Aðalsteinsson formaður.
  

A-lið Goðans upp um deild !

A-lið Goðans náði öðru sæti í 3 deildinni í kvöld eftir stórsigur á Helli-C 5,5-0,5. 

Jón Þorvaldsson, Björn Þorsteinsson, Tómas Björnsson, Þröstur Árnason og Kristján Eðvarðsson, tóku við silfrinu í kvöld. Á myndina vantar Ásgeir P Ásbjörnsson og Einar Hjalta Jensson.

B-liðið tapaði fyrir B-liði Víkingasveitarinnar í 7. umferð og missti þar með af sæti í 3. deild að ári.
Páll Ágúst, Sveinn, Jakob og Smári gerðu jafntefli en Rúnar og Sigurður Jón töpuðu.

C-liðið tapaði naumlega fyrir SA-d 2.5-3.5 í 7. umferð. Hlynur vann sína skák, Snorri, Bjössi og Sighvatur gerðu jafntefli en Hermann og Valur töpuðu.

A-lið Goðans gerði 3-3 jafntefli við TV-b í 6. umferð og var samið á öllum borðum. Ásgeir, Kristján, Einar Hjalti, Þröstur, Björn og Tómas tefldu.

B-liðið vann stórsigur á Kórdrengjunum 6-0. Sigurður Jón, Páll, Sveinn, Rúnar og Jakob unnu og Smári fékk ekki andstæðing.

Á sama tíma tapaði C-liðið stórt fyrir SFÍ 0-6. Hermann, Sighvatur, Snorri, Bjössi, Valur og Hlynur tefldu.

Lokastaðan í 3. deild:

1	1	Vikingaklubburinn A	7	6	1	0	13	31.5	0
2	13	Godinn A	7	4	3	0	11	28.0	0
3	7	TV B	7	4	2	1	10	26.0	0
4	12	TG A	7	4	2	1	10	25.0	0
5	3	KR B	7	5	0	2	10	24.5	0
6	11	SA B	7	4	0	3	8	22.0	0
7	14	TG B	7	3	1	3	7	22.5	0
8	6	Hellir D	7	3	1	3	7	20.0	0
9	10	TB C	7	3	0	4	6	22.0	0
10	5	Sf. Vinjar A	7	3	0	4	6	21.0	0
11	4	Hellir C	7	3	0	4	6	18.5	0
12	16	SR B	7	2	1	4	5	18.0	0
13	8	SA C	7	2	1	4	5	17.5	0
14	2	TR C	7	2	0	5	4	19.0	0
15	9	TV C	7	1	2	4	4	13.5	0
16	15	Haukar C	7	0	0	7	0	7.0	0

Lokataðan í 4. deild:

Athygli vekur að B-lið Goðans fékk næsta flesta vinninga í 4. deildinni en endaði samt í 8. sæti.

1	18	SFÍ	7	6	0	1	12	31.0	0
2	8	Sf. Sauðarkroks	7	5	1	1	11	25.5	0
3	6	TV D	7	4	2	1	10	26.0	0
4	4	Vikingaklubburinn B	7	5	0	2	10	25.5	0
5	9	UMSB	7	4	1	2	9	27.5	0
6	20	S.Austurlands	7	4	1	2	9	24.0	0
7	2	Fjolnir B	7	4	1	2	9	23.5	0
8	22	Godinn B	7	4	0	3	8	28.0	0
9	21	SSON B	7	4	0	3	8	25.0	0
10	15	TR D	7	4	0	3	8	22.5	0
11	14	SA D	7	4	0	3	8	21.0	0
12	19	Sf. Vinjar B	7	3	0	4	6	21.0	0
13	7	Aesir feb	7	3	0	4	6	20.5	0
14	3	Hellir E	7	3	0	4	6	19.5	0
15	12	Godinn C	7	2	2	3	6	19.0	0
16	23	Fjolnir C	7	1	3	3	5	16.5	0
17	5	Kordrengirnir	7	2	1	4	5	15.0	0
18	1	TR E	7	2	1	4	5	14.5	0
19	17	TG C	7	2	0	5	4	17.0	0
20	13	UMFL	5	2	0	3	4	14.5	0
21	16	Osk	7	1	2	4	4	11.5	0
22	11	Fjolnir D	7	1	1	5	3	12.5	0
23	10	TV E	1	0	0	1	0	0.0	0

Liðsstjórarpislar eru væntanlegir á morgun.

Íslandsmót skákfélaga. Seinni hlutinn að hefjast.

Í kvöld hefst seinni hlut Íslandsmóts skákfélaga þegar 5. umferð verður tefld kl 20:00 í Rimaskóla í Grafarvogi.  A-lið Goðans á í hörku baráttu um efstu tvö sætin í 3. deild og stefnan er að sjálfsögðu tekin á sigur í deildinni.  A-liðið mætir B-liði nágranna okkar í SA í 5. umferð ,en erfitt er að segja nákvæmlega um hverjir verða andstæðingarnir í 6 og 7. umferð sem tefldar verða á laugardaginn.

Staðan í 3. deild.

Rk.	SNo	Team	Games	+	=	-	TB1	TB2	TB3
1	1	Vikingaklubburinn A	4	3	1	0	7	17.5	0
2	12	TG A	4	3	1	0	7	15.0	0
3	7	TV B	4	3	0	1	6	15.5	0
4	11	SA B	4	3	0	1	6	15.5	0
5	13	Godinn A	4	2	2	0	6	15.0	0
6	2	TR C	4	2	0	2	4	13.5	0
7	4	Hellir C	4	2	0	2	4	12.0	2
8	10	TB C	4	2	0	2	4	12.0	0
9	3	KR B	4	2	0	2	4	11.5	0
10	14	TG B	4	1	1	2	3	13.0	0
11	8	SA C	4	1	1	2	3	11.0	0
12	6	Hellir D	4	1	1	2	3	10.5	0
13	9	TV C	4	1	1	2	3	8.5	0
14	5	Sf. Vinjar A	4	1	0	3	2	9.5	0
15	16	SR B	4	1	0	3	2	8.0	0
16	15	Haukar C	4	0	0	4	0	4.0	0

Vinnist sigur á SA-b er öflugt lið TV-b líklegir andstæðingar A-liðsins í 6. umferð. 

B og C-lið Goðans tefla í 4. deildinni. B-liðið á möguleika á því að ná í þriðja sætið í deildinni, sem gefur sæti í 3. deild að ári, vinnist allar viðureignirnar sem eftir eru og úrslit í öðrum viðureignum verði okkur hagstæð. C-liðið verður líklega ekki í toppbaráttunni, en stefnir að sjálfsögðu á að ná góðum árangri.

Staðan í 4. deild:

 

Rk.	SNo	Team	Games	+	=	-	TB1	TB2	TB3
1	8	Sf. Sauðarkroks	4	4	0	0	8	17.0	0
2	2	Fjolnir B	4	4	0	0	8	15.5	0
3	9	UMSB	4	3	0	1	6	18.0	0
4	18	SFÍ	4	3	0	1	6	16.5	0
5	15	TR D	4	3	0	1	6	16.0	0
6	20	S.Austurlands	4	3	0	1	6	14.0	0
7	22	Godinn B	4	2	0	2	4	14.5	0
8	13	UMFL	4	2	0	2	4	14.5	0
9	21	SSON B	4	2	0	2	4	14.5	0
10	6	TV D	4	1	2	1	4	13.5	0
11	4	Vikingaklubburinn B	4	2	0	2	4	13.0	0
12	7	Aesir feb	4	2	0	2	4	13.0	0
13	12	Godinn C	4	1	2	1	4	12.5	0
14	23	Fjolnir C	4	1	2	1	4	10.0	0
15	17	TG C	4	2	0	2	4	9.5	0
16	5	Kordrengirnir	4	1	1	2	3	11.0	0
17	1	TR E	4	1	1	2	3	8.5	0
18	19	Sf. Vinjar B	4	1	0	3	2	10.5	0
19	3	Hellir E	4	1	0	3	2	8.0	0
20	14	SA D	4	1	0	3	2	7.5	0
21	11	Fjolnir D	4	0	1	3	1	6.5	0
22	16	Osk	4	0	1	3	1	4.0	0
23	10	TV E	0	0	0	0	0	0.0	0

B-liðið teflir við Æsir, sem er skákfélag eldri borgara og C-liðið teflir við C-lið Fjölnis í 5. umferð.

Hægt verður að fylgast með gengi Goðans um helgina hér á síðunni.

Mótið á chess-results:
3. deildin.
http://chess-results.com/tnr38867.aspx?art=0&lan=1&m=-1&wi=1000

4. deildin:
http://chess-results.com/tnr38868.aspx?art=0&lan=1&m=-1&wi=1000

A-sveit Goðans taplaus á Íslandsmótinu. Liðsstjóra pistill.

Jón Þorvaldsson liðsstjóri A-liðs Goðans skrifaði pistil um frammistöðu A-liðsins í fyrri hluta Íslandsmóts skákfélaga sem er birtur hér fyrir neðan í heild sinni. Pistill frá formanni er væntanlegur í kvöld eða á morgun. 

Helgina 8. - 10 . okt. þreytti A-sveit Goðans frumraun sína í 3. deild Íslandsmóts skákfélaga og stóð sig með sóma. Goðinn hafði safnað vösku liði  enda uggði menn að þriðja deildin yrði mun strembnari Herðubreið að klífa en sú fjórða, sem og kom á daginn. Kapparnir Ásgeir P. Ásbjörnsson, Einar Hjalti Jensson,  Björn Þorsteinsson og Tómas Björnsson höfðu gengið til liðs við Goðann fyrir þessa leiktíð en fyrir voru kempurnar Sigurður J. Gunnarsson, Sindri Guðjónsson og Jón Þorvaldsson, liðsstjóri.

 

Ásgeir, Hermann, Hlynur, Valur, Smári, Sindri, Pétur, Rúnar, Benedikt, Jakob, Bjössi, Sigurður, Björn, Sighvatur, Tómas, Einar og Jón gestgjafi. Svein, Snorra, Viðar og Andra vantar á myndina. 

Undirbúningur var góður. Keppendur höfðu æft saman um nokkurra vikna skeið undir öruggri stjórn þjálfara liðsins, Einars Hjalta, farið yfir valdar byrjanir og eflt með sér liðsanda undir forystu Tómasar Björnssonar. Lokahnykkur undirbúningsins var svo föstudagsdaginn 8. okt.  þegar liðsmenn Goðans úr öllum þremur sveitunum hittust yfir léttum málsverði.

 

Léttur kvöldverður fyrir átökin á föstudaginn. 

Mannýgir hrútar

Það var glatt á hjalla þessa síðdegisstund en skemmtilegu samneyti lauk með orðum formannsins, Hermanns Aðalsteinssonar, sem eggjaði menn til dáða, gráa fyrir járnum. Í bálokin gall við í einum árvökulum félaganum að umfram allt skyldu menn vara sig á bévítis gemsunum og helst umgangast þá eins og mannýga hrúta.  Vissast væri  slökkva á þeim strax, taka rafhlöðurnar úr,  geyma gemsana í bílunum og leggja a.m.k. 100 metrum frá skákstaðnum. Slík væri váin. Síst mætti henda að góðri taflmennsku væri spillt með jarmandi gemsa sem leiddi beint til taps, viðkomandi skákmanni til hneisu og öðrum keppendum til armæðu og hugmyndateppu.

 

Goðinn - Sf Vinjar í 1. umf. Einar, Björn, Tómas, Sigurður og Sindri. 

Í fyrstu umferð á föstudagskvöldið var tekist á við skákfélagið Vinjar. Þeir kappar eru margreyndir og ólseigir en góður sigur hafðist að lokum, 5 - 1, sem skaut Goðanum rakleiðis í 2. sætið. Í fyrri umferðinni á laugardeginum var röðin komin að B sveit KR sem var ein allra sterkasta sveitin í 4. deildinni í fyrra. Eftir snarpa viðureign hafðist sigur, 4 - 2, en óvænt tap á báðum neðstu borðum kom í veg fyrir enn stærri sigur.

Spennan magnast

Spennan magnaðist og síðari viðureign dagsins var sannkallaður stórislagur gegn hinum snjöllu og vöðvastæltu liðsmönnum Víkingasveitarinnar. Sveitirnar eru nánast hnífjafnar  í skákstigum talið og svo römm var viðureignin að brakaði í hverju borði enda ekki við öðru að búast þegar goðar og víkingar reyna með sér í rammheiðnum anda.  Niðurstaðan varð 3 - 3 þar sem jafnt var á öllum borðum nema hvað Ásgeir lagði sinn andstæðing á 1. borði á afar sannfærandi hátt en skákin á 6. borði tapaðist örugglega. Sigur Ásgeirs gegn hinum öfluga Fide meistara Davíð Kjartanssyni var þeim mun athyglisverðari þar sem sá síðarnefndi sá aldrei til sólar í skákinni. Slík var snilld Ásgeirs sem fyrir þetta mót hafði ekki komið nálægt keppnisskák í fjölda ára. Mikill fengur er fyrir íslenska skákíþrótt að fá Ásgeir aftur að reitunum hvítu og svörtu.

 

Goðinn- Víkingaklúbburinn. Ásgeir með hvítt gegn Davíð Kjartanssyni.

Í lokaumferðinni á sunnudag tefldi Goðinn við A-sveit Garðabæjar sem var í efsta sæti fyrir umferðina, stigi á undan okkar mönnum. Líkt og í viðureigninni við Víkingasveitina var sennan afar hörð og niðurstaðan aftur jafntefli. Nú varð það hinn margfaldi Íslandsmeistari, Reykjavíkurmeistari og Ólympíufari Björn Þorsteinsson sem hélt uppi heiðri Goðans með góðum endataflssigri á hinum ágæta skákmanni Jóni Þór Bergþórssyni en skákin á 6. borði tapaðist þó að vænlega horfði þar framan af.

 

              Tómas Björnsson og Björn Þorsteinsson. 

Að loknum fjórum umferðum eru sveit Garðbæinga og Víkingasveitin jafnar í efsta sæti með 7 stig og en þessar sveitir leiða saman riddara sína í 5. umferðin í mars nk. Í 3-5. sæti eru svo B sveit Vestamannaeyinga, B sveit Akureyringa og Goðinn með 6 stig en þessar fimm sveitir munu greinilega berjast til þrautar um tvö efstu sætin sem veita rétt til keppni í 2. deild leiktíðina 2011 - 2012.

 

                    Sindri Guðjónsson og Sigurður Jón Gunnarsson.

Góð liðsheild

Um frammistöðu einstakra liðsmanna er það að segja að Ásgeir og Björn fóru á kostum, hlutu hvor um sig 3,5 vinninga af 4. Einar Hjalti  og Tómas voru líka mjög öflugir, skiluðu sveitinni 3 vinningum af 4 hvor. Jón tefldi upp á öryggið og gerði jafntefli í báðum sínum skákum. Hinir snjöllu skákmenn Sigurður Jón og Sindri voru fjarri sínu besta að þessu sinni enda báðir langþreyttir eftir mikla vinnu vikurnar fyrir mótið. Það sem öllu skiptir er að heildarframmistaða Goðans var mjög góð og geta keppendur og stuðningsmenn sannarlega hlakkað til spennandi úrslitaumferða á næsta ári.

 

                 Einar Hjalti Jensson og Ásgeir Ásbjörnsson. 

Keppendum Goðans er þökkuð vasklega framganga og keppinautum Goðans þökkum við drengilega keppni og skemmtileg viðkynni. Jafnframt er ástæða er til að þakka forseta Skásambands Íslands, Gunnari Björnssyni, og starfsmönnum mótsins fyrir góða skipulagningu og þá miklu vinnu sem þarf til að hið fjölmenna Íslandsmót skákfélaga gangi snurðulaust fyrir sig. Þá er sérstök ástæða til að þakka Helga Árnasyni, skólastjóra Rimaskóla, fyrir að leggja skákmönnum til prýðilega aðstöðu til iðkunar þessarar merku íþróttar hugans sem nýtur vaxandi og verðskuldaðrar lýðhylli.

Jón Þorvaldsson liðsstjóri A-liðs Goðans.

Goðinn í 3-5 sæti.

A-lið Goðanser í 3-5 sæti í 3. deild með 6 stig og 15 vinninga að afstöðnum fyrri hluta Íslandsmóts skákfélaga. A-lið Víkingaklúbbsins leiðir 3. deildina með 7 stig og 17,5 vinninga. A-liðið gerði 3-3 jafntefli við A-lið Taflfélags Garðabæjar í spennandi viðureign. Björn þorsteinsson vann sinn andstæðing, Ásgeir, Einar,Tómas og Jón gerðu jafntefli, en Sigurður tapaði. 

B-lið Goðans er í 7 sæti með 4 stig og 14,5 vinninga og C-liðið er í 13 sæti með 4 stig og 12,5 vinninga. B-liðið tapaði í dag 2-4 fyrir TR-d. C-liðið gerði 3-3 jafntefli við TV-d  

Seinni hlutinn verður tefldur dagana 4-5 mars 2011.  Þá mætir A-lið Goðans B-liði Skákfélags Akureyrar í 5. umferð. B-liðið mætir skákfélaginu Æsir og C-liði keppir við Fjölni - C

Staðan í 3.deild
http://chess-results.com/tnr38867.aspx?art=0&lan=1&m=-1&wi=1000

Staðan í 4. deild
http://chess-results.com/tnr38868.aspx?art=0&lan=1&m=-1&wi=1000

Íslandsmóti skákfélaga verður gerð skil í pistli formanns á morgun og þá verða birtar myndir frá mótinu.

Skin og skúrir í dag.

Tvær umferðir voru tefldar í dag á íslandsmóti skákfélaga. A-sveit Goðans vann sigur á KR-b í annari umferð 4-2. Ásgeir, Einar, Björn og Tómas unnu, en Sigurður og Sindri töpuðu. A-sveitin gerði svo 3-3 jafntefli við A-sveit Víkingaklúbbsins í 3. umferð. Frábær úrslit gegn sterkri sveit.
Ásgeir Ásbjörnsson vann afar glæsilegan sigur á Davíð Kjartanssyni á fyrsta borði. Einar, Björn, Tómas og Jón Þorvaldsson gerðu jafntefli en Sindri tapaði. 

Ásgeir Ásbjörnsson (t,v) vann Davíð Kjartansson í dag. Ásgeir hefur unnið allar skákirnar í mótinu sem er frábær árangur. Ásgeir hefur engu gleymt þó svo að hátt í 30 ár séu liðin frá því að hann tefldi kappskák síðast.

B-sveitin vann stóran 6-0 sigur á TR- í annari umferð.. Sveinn, Rúnar, Jakob, Smári, Benedikt og Hermann tefldu. B-sveitin tapaði svo 1-5 fyrir SFÍ í þriðju umferð. Jakob og Smári gerðu jafntefli, en Rúnar, Benedikt, Hermann og Sighvatur töpuðu.

Viðar Hákonarson hefur unnið báðar skákir sínar í dag, en hann tefldi fyrir C-liðið.

C-sveitin töpuðu naumlega fyrir 2,5-3,5 fyri Helli-e. Valur Heiðar vann skák létt þegar sími andstæðingsins hringdi snemma í skákinni og Viðar Hákonarson vann sína fyrstu skák á 6. borði. Hlynur Snær gerði jafntefli. Snorri, Bjössi og Sighvatur töpuðu. C-liðið vann svo Fjölni -d 4-2 í 3. umferð. Valur, Bjössi, Viðar og Andri Valur unnu sínar skákir, en Snorri og Hlynur töpuðu.

Valur Heiðar Einarsson (í blárri skyrtu) er búinn að vinna allar sínar þrjár skákir. Valur og Ásgeir eru þeir einu sem eru með fullt hús vinninga. Andri Valur Ívarsson (í grárri peysu) tefldi eina skák sem varamaður í dag og vann hana að sjálfsögðu.

A-lið Goðans er í 3 sæti í 3 deild með 5 stig og 12 vinninga.
 http://chess-results.com/tnr38867.aspx?art=0&rd=3&lan=1&m=-1&wi=1000

B-liðið er í 5. sæti í 3-4. deild með 4 stig og 12,5 vinninga.
C-liðið er í 12. sæti með 3 stig og 9,5 vinninga.
http://chess-results.com/tnr38868.aspx?art=0&lan=1&m=-1&wi=1000

4. ufmerð verður tefld kl 11:00 á morgun sunnudag. A-liðið mætir A-liði Taflfélags Garðarbæjar. b-liðið mætir TR-d og C-liðið fær TV-d.