Jóhann Sigurðsson. Minning.

Jóhann Sigurðsson á Stórutjörnum og einn af stofnfélögum Goðans, lést snemma í janúar, en hann var þá staddur erlendis. Útför hans fór fram frá Akureyrarkirkju í dag, að viðstöddu fjölmenni.

                    Jóhann Sigurðsson.

Jóhann var mjög virkur á upphafsárum Goðans og mætti þá á allar skákæfingar og skákmót sem Goðinn hélt.  Jóhann varð í öðru sæti á Skákþingi Goðans árið 2005 en Ármann Olgeirsson hreppti þá titilinn á stigum. Jóhann varð einnig í öðru sæti á Hraðskákmót Goðans árið 2005 og í þriðja sæti á fyrsta skákmóti Goðans árið 2004 á eftir Baldri Daníelssyni og Ármanni.

Jóhann tefldi með Skákfélagi Akureyrar í mörg ár áður en hann flutti í Stórutjarnir og gekk í raðir Goðans.

Jóhann tók þátt í nýliðnu hraðskákmóti Goðans á Húsavík sem var hans síðasta skákmót.

Ritstjóri vottar fjölskyldu og ættingjum Jóhanns samúð sína.

Aftur um 30 ár !

Nú eru talsvert safn af gömlum myndum frá hinum ýmsu skákviðburðum á Húsavík, orðið aðgengilegt hér á síðunni, í 2 myndaalbúmum.  Þau eru hér til hliðar neðar á síðunni.  Eitt albúm er síðan væntanlegt í viðbót á morgun.

Haraldur Sigurjónsson, þá ungur að árum, gerði jafntefli við Boris Spassky í fjöltefli á Hótel Húsavík árið 1978. 

Áhugasamir eru beðnir um að skrifa athugasemdir við myndirnar í myndaalbúmunum, telji þeir sig þekkja hverjir eru á umræddum myndum. 

Hermann Aðalsteinsson.

 

Hjálmar Theodórsson.

Hjálmar Theodórsson var einn sterkasti skákmaður Húsvíkinga um árabil.  Hann varð skákmeistari Taflfélags Húsavíkur margoft.

Hjálmar varð Skákmeistari Norðlendinga tvisvar, árið 1965 (ásamt Hjörleifi Halldórssyni) og 1970.

Hjámar varð einnig Hraðskákmeistari Norðlendinga tvisvar, árið 1958 og 1960.

 

 

 

 

 

 

 

 

Hjálmar Theodórsson.

Jakob Sævar Sigurðsson teflir í áskorendaflokki.

Okkar maður Jakob Sævar Sigurðsson (1860) teflir í áskorendaflokki
skákþings Íslands sem hefst á miðvikudaginn. Teflt verður í Reykjavík.

Nú þegar eru 25 keppendur skráðir til leiks.

Tefldar verða 9 umferðir með 90 mín + 30 sek á leik.

 

 

Fylgst verður með gengi Jakobs hér á síðunni.

Nýr félagsmaður !

Sigurður Jón Gunnarsson, er genginn til liðs við Skákfélagið Goðann.   Hann er búsettur í Reykjavík.

Sigurður Jón er öflugur skákmaður en hefur lítið teflt að undanförnu.   Sigurður hefur 1885 skákstig (eftir 39 skákir).  Hans síðasta mót var deildarkeppnin 1990, en þá tefldi hann fyrir skákfélag Sauðárkróks.

Hann kemur til með að styrkja A-sveit Goðans verulega í deildarkeppninni í haust. 

Stjórn skákfélagsins býður Sigurð Jón Gunnarsson velkominn í Goðann.  H.A.

Helgarskákmót Hellis og T.R. Jakob Sævar meðal keppenda.

Helgarskákmót Hellis og T.R. hefst annað kvöld. (föstudagskvöld)  Okkar maður, Jakob Sævar Sigurðsson er meðal keppenda.  Tefldar verða 4 atskákir á föstudagskvöldið og síðan 2 kappskákir á laugardag og ein á sunnudag.  

Meðal keppanda er Davíð Kjartansson, Sverrir Örn Björnsson, Halldór Brynjar Halldórsson og Stefán Bergsson.

Fylgst verður með gengi Jakobs hér á síðunni um helgina. H.A.

Sumarskákmót Goðans.

Sumarskákmót Goðans verður haldið í Litlulaugaskóla í Reykjadal mánudagskvöldið 30 júní. Mótið hefst kl 20:30.  Tefldar verða 10 eða 15 mín skákir. (Eftir þátttöku)

Sérstakur gestur á mótinu verður Omar Salama (2205) skákkennari.

Það kostar ekkert að vera með en engin verðlaun verða veitt í mótinu

Félagsmenn í Goðanum,  sem og aðrir skákmenn í nágrenninu, er hvattir til þess að vera með í móti þessu.   H.A.

Íslandsmót skákfélaga 2008-9. Seinni hlutinn tefldur á Akureyri.

Nú er búið að ákveða dagsetningar fyrir Íslandsmót skákfélaga 2008-9. Fyrri hlutinn verður tefldur dagana 3-5 október nk. í Reykjavík, en seinni hlutinn 6-7 mars 2009 á Akureyri. (að öllum líkindum)

Skákfélag Akureyrar á 90 ára afmæli um þessar mundir og í tilefni þess verður seinni hlutinn tefldur á Akureyri.  Þetta er auðvitað fagnaðarefni fyrir okkur því ferðakostnaður sparast, tími og fyrirhöfn.

Stjórn Goðans stefnir að því að stilla upp tveimur skáksveitum til keppni í 4. deildinni. (A og B lið) Það ætti að vera vel raunhæft markmið. það hefur fjölgað í félaginu og síðan er tímasetningin á fyrri hlutanum sennilega heppilegri fyrir marga og svo er staðsetningin á seinni hlutanum augljós kostur fyrir okkur.

Félagsmenn eru hvattir til að taka frá þessar dagsetningar og láta skák ganga fyrir þessar helgar !  H.A.

Félagsmönnum fjölgar.

Í dag gengu tveir skákmenn til liðs við Goðann. Þeir eru Ævar Ákason og Barði Einarssson.

Ævar Ákason (1620) er búsettur á Húsavík og fyrrum liðsmaður Taflfélags Húsavíkur.  Hann tók þátt í skákþingi Goðans um daginn.

Barði Einarsson er búsettur í Reykjavík. Hann hefur lítið teflt á Íslandi en var virkur í Bretlandi. Hann er með 144 Bresk skákstig (sem er styrkleiki á við 2000 FIDE) en fór hæst í 159 stig.

Eftir þessa fjölgun eru 28 skákmenn skráðir í Goðann.

Stjórn skákfélagsins Goðans býður þá félaga velkomna í félagið. H.A.

 

 

 

Myndir úr héraðsmótinu.

Hópmynd af keppendum.