Ásgeir og Einar komnir með FM-titil.

Ásgeir Páll Ásbjörnsson og Einar Hjalti Jensson eru búnir að fá FM-titil, (FIDE-Master) en kröfunum sem til titilhafa eru gerðar, uppfylltu þeir nú nýlega með því að rjúfa 2300 stiga múrinn.

 

 

 

 

Þeir bætast því í hóp 5 annarra félagsmanna sem hafa unnið til titla. Það hafa Helgi Áss Grétarsson og Þröstur Þórhallsson stórmeistarar gert og Sigurður Daði Sigfússon, Þröstur Árnason og Tómas Björnsson voru með FM-titil fyrir.

 

Töfluröð Íslandsmóts skákfélaga 2012-13

Í gær var dregið um töfluröð í fyrstu deild á Íslandsmóti skákfélaga sem hefst 5. október nk. Hellir A-sveitverða fyrstu andstæðingar Goðans í frumraun okkar meðal þeirra bestu.

 

Fyrri hluti 5-7 október 2012

1.            Hellir - Goðinn 

2.            Goðinn - SA 

3.            TB b - Goðinn

4.            Goðinn – TR

---------------------------------------------------------------------

Seinni hlutinn mars 2012

5.            Víkingar - Goðinn

6.            Goðinn - TB a

7.            TV - Goðinn 

 

Töfluröð 1. deild 2012-13.

 

1.            Hellir

2.            Taflfélag Bolungarvíkur b

3.            Víkingaklúbburinn

4.            Taflfélag Vestmannaeyja

5.            Skákfélag Akureyrar

6.            Taflfélag Reykjavíkur

7.            Taflfélag Bolungavíkur a

8.            Goðinn 

 

Ritstjóra er ekki kunnugt um töfluröð í 2. deild. Eins og venjulega er ekki hægt að segja til um andstæðinga í 4. deild. það kemur ekki í ljós fyrr en 5. október. 

Sigur á Íslandsmeisturunum.

Nokkuð óvænt úrslit urðu í 1. umferð Hraðskákkeppni taflfélaga í kvöld  þegar Goðar gengu milli bols og höfuðs á margföldum Íslandsmeisturum Bolvíkinga. Lokatölur urðu 43-29 Goðum í vil og var tónninn sleginn strax í fyrstu umferð með 4,5-1,5 sigri. Bolvíkingar unnu aðeins eina umferð af tólf, þremur lauk með skiptum hlut en Goðar höfðu betur átta sinnum.

 

Jóhann Hjartarson geng Þresti Þórhallssynin og Bragi Þorfinnsson gegn Helga Áss Grétarssyni fjær.
Einar Hjalti Jensson, Sigurður Daði Sigfússon, Ásgeir Ásbjörnsson og Kristján Eðvarðsson fjæst.

Helgi Áss Grétarsson var hamrammur og hjó á báðar hendur. Hann hlaut flesta vinninga Goða, alls 10,5 og leyfði aðeins 3 jafntefli. Þröstur Þórhallsson kom næstur með 9 vinninga og Ásgeir P. Ásbjörnsson hlaut 7,5. Flesta vinninga Bolvíkinga hlaut Jóhann Hjartarson sem tefldi af miklu öryggi og innbyrti  9,5 vinninga. Hann var taplaus eins og Helgi Áss en gerði 5 jafntefli. Jón Viktor Gunnarsson kom næstur í mark með 8,5 vinninga og Bragi Þorfinnsson uppskar 7.

Árangur Goða

 

• Helgi Áss Grétarsson                  10,5 v. /12

• Þröstur Þórhallsson                     9,0 v. /12

• Ásgeir P. Ásbjörnsson                 7,5 v. /12

• Einar Hjalti Jensson                      5,5 v. /11

• Kristján Eðvarðsson                     5,5 v. /12

• Sigurður Daði Sigfússon               3,5 v. /10                          

• Tómas Björnsson                          1,5 v. /03

 

Árangur Bolvíkinga

 

• Jóhann Hjartarson                        9,5 v. /12

• Jón Viktor Gunnarsson               8,5 v. /12

• Bragi Þorfinnsson                          7,0 v. /12

• Halldór Grétar Einarsson            3,0 v. /12

• Árni Á. Árnason                              0,5 v. /12

• Guðmundur M. Daðason           0,5 v. /12

 

Nokkra sterka hraðskákmenn vantaði í bæði lið en missir Bolvíkinga var þó tilfinnanlegri.

 Teflt var í húsakynnum Skáksambands Íslands og eru forvígismönnum SÍ þökkuð afnotin af aðstöðunni. Þá fær Rúnar Berg sérstakar þakkir fyrir að fara yfir hraðskákreglur með keppendum í upphafi viðureignar og vera þeim innan handar um vafaatriði. Goðar þakka Bolvíkingum drengilega viðureign og óska þeim velfarnaðar á hvítum reitum og svörtum.

Síðar um kvöldið var svo dregið í 8-liða úrslit og verða nágrannar okkar í SA næstu andstæðingar Goðans. 

Heimasíða mótsins

Gawain breskur meistari í skák.

Goðamaðurinn Gawain Jones (2655) varð í dag breskur meistari í skák.  Jones varð efstur ásamt stórmeistaranum Stephen Gordon (2539) en þeir hlutu 9 vinninga í 11 skákum en sjálfu mótinu lauk í gær.  Þeir tefldu úrslitaeinvígi með atskákfyrirkomulagi í dag og þar hafði Gawain betur.  Dawid Howell (2620) varð þriðji með 8,5 vinning en þessir þrír höfðu yfirburði.

Alls tóku 65 skákmenn þátt í efsta flokki mótsins.  Þar á meðal voru 7 stórmeistarar.   Mótið nú var það 99. í sögunni og aldrei áður hefur breska meistaramótið farið fram jafn norðanlega í Englandi en mótið er jafnframt meistaramót Englands.

Til hamingju Gawain.

Heimasíða Breska meistaramótsins

Rúnar Ísleifsson til liðs við SA.

Rúnar Ísleifsson hefur tilkynnt félagaskipti úr Goðanum í Skákfélag Akureyrar.

                                  Rúnar Ísleifsson. 

Rúnar hefur verið einn af máttarstólpum Goðans frá því að hann flutti að austan fyrir 6 árum síðan. Rúnar varð skákmeistari Goðans í febrúar 2012 í annað sinn, en Rúnar vann titilinn einnig árið 2010. Rúnar hefur einnig unnið hin ýmsu styttri skákmót Goðans  á undanförnum árum.

Rúnar hefur verið fastamaður í A og B-sveitum Goðans í Íslandsmóti skákfélaga um árabil og alltaf staðið sig með miklum sóma.  

Stjón Skákfélagsins Goðans óskar Rúnari góðs gengis með Skákfélagi Akureyrar í framtíðinni. 

Bolvíkingar í fyrstu umferð.

Í gærkvöld var dregið í forkeppni og fyrstu umferð Hraðskákkeppni taflfélaga.  Hvorug tveggja á að vera lokið eigi síður en 15. ágúst nk.   Allmikið er um spennandi viðureignir og má þar nefna að Taflfélag Bolungarvíkur og Skákfélagið Goðinn mætast í 1. umferð. Bolvíkingar eru ríkjandi meistarar þannig að það er ekki ráðist á garðinn þar sem hann er lægstur. Ekki hefur verið ákveðið hvenær viðureignin fer fram.

Forkeppni:

• Skákfélag Selfoss og nágrennis - Skákdeild Hauka
• Taflfélag Vestmannaeyja - Víkingaklúbburinn

1. umferð (16 liða úrslit)

• Skákfélag Reykjanesbæjar - Taflfélag Vestmannaeyja/Víkingaklúbburinn
• Skákfélag Akureyrar - Taflfélagið Mátar
• Briddsfjelagið - Taflfélagið Akraness
• Taflfélag Garðabæjar - Skákdeild Vinjar
• Taflfélag Bolungarvíkur - Skákfélagið Goðinn
• Taflfélagið Hellir - Skákfélag Selfoss og nágrennis/Skákdeild Hauka
• Skákdeild Fjölnis - Taflfélag Reykjavíkur
• Skákdeild KR -Skákfélag Íslands

Heimasíða mótsins

Gawain Jones stafnbúi Goðans!

Í fornum ritum íslenskum er stafnbúa víða getið og þótti sæmdarheiti. Stafnbúar voru vígamenn er stóðu í stafni herskipa og var þeim falinn sá virðingarstarfi að aflífa sem flesta úr framvarðarsveit andstæðinganna. Hið rammíslenska skákfélag Goðinn hefur nú valið sér stafnbúa fyrir orrustur vetrarins. Sá er enskur og heitir Gawain Jones. Stafnbúanum er að fornum sið treyst til að þjarma að andstæðingum sínum á 1. borði Goðans á Íslandsmóti skákfélaga.

 

 

Sue Maroroa Jones og Gawain Jones á Sólheimajökli.

 

Gawain (2655) er einn af öflugustu skákmönnum Englendinga um þessar mundir þó að hann sé aðeins 24 ára að aldri. Ferill hans hefur verið afar farsæll. Hann ávann sér fyrst lýðhylli þegar hann lagði alþjóðlegan skákmeistara að velli, aðeins níu vetra. Nafnbótina stórmeistari hlaut hann svo áratug síðar. Gawain hefur vegnað vel á alþjóðlegum mótum, deildi m.a. fyrsta sæti á London Classic Open 2010 og sigraði á Breska samveldismótinu 2011. Leiktíðina 2011-2012 tefldi hann fyrir hið ágæta skákfélag Máta í fyrstu deild Íslandsmótsins og hlaut 5 vinninga af sex mögulegum. Í kjölfarið tók hann þátt í Alþjóðlega  Reykjavíkurskákmótinu í Hörpu þar sem hann hafnaði í 2.- 8. sæti. 

Gawain er maður víðförull og langförull eins og stafnbúa sæmir. Hann fæddist í Jórvíkurskíri en hefur búið á Ítalíu, Írlandi, Ástralíu og á Nýja-Sjálandi. Hann er fjölhæfur íþróttamaður, leikur tennis, hleypur vasklega og er vel liðtækur glímumaður. Það verður Goðanum því  ánægjuefni að efna til móts í íslenskri glímu, Gawain til heiðurs, þegar hann sækir Þingeyjarsýslurnar heim í haust og fróðlegt að sjá hvernig honum vegnar á þeim vettvangi. Einnig kemur til greina að Gawain tefli fjöltefli á vegum Goðans á Húsavík.

Í för með Gawain verður eiginkona hans, Sue Maroroa Jones. Sú mæta kona er nýsjálensk að uppruna og er ágæt skákona með 2035 elóstig. Sue mun án efa styrkja B-sveit Goðans með kunnáttu sinni og reynslu.

 

Goðinn býður Sue og Gawain hjartanlega velkomin í raðir félagsins og væntir mikils af atfylgi þessara góðu gesta. 

Helgi innvígður í Goðann.

Í dag var Helgi Áss Grétarsson innvígður í Goðann með formlegum hætti.
Innvígslan fór fram heima hjá formanni í Þingeyskri bongóblíðu.

 

Hermann Aðalsteinsson afhendir Helga Áss Grétarssyni Goðabolinn sinn. 

Sú hefð hefur skapast hjá Goðanum að allir nýjir félagsmenn fá Goða-bol afhentan við inngöngu í félagið.  

Þó nokkuð af bolum er til á lagar hjá Goðanum.

Helgi Áss Grétarsson orðinn Goði !

 

Skammt er stórra högg milli hjá Goðanum því að í dag gekk Helgi Áss Grétarsson, stórmeistari og fyrrum heimsmeistari ungmenna, til liðs við Goðann. Helgi Áss er annar íslenski stórmeistarinn sem gengur Goðanum á hönd og hittir þar fyrir félaga sinn, Þröst Þórhallsson, sem nýgenginn er í félagið.

 

Ljóst er að Goðanum er gríðarlegur liðsauki að Helga og munar um minna þegar hin knáa A-sveit Goðans þreytir frumraun sína í 1. deild Íslandsmótsins í haust í baráttu við firnasterka keppinauta. Hermann Aðalsteinsson, formaður Goðans:  „Þetta eru mikil gleðitíðindi. Við Goðar erum sannarlega stoltir af því að þessi  öflugi og fjölhæfi skákmaður laðist að þeirri skákmenningu og umgjörð sem við höfum upp á að bjóða. Við hlökkum til að njóta atfylgis Helga og gerumst nú enn upplitsdjarfari þegar horft er til komandi leiktíðar. Með inngöngu Helga Áss og Þrastar í félagið er sterkum stoðum rennt undir framtíð Goðans meðal fremstu skákfélaga á landinu.“  

 

Skákferill Helga Áss er glæsilegur. Árið 1994, þegar Helgi var sautján vetra, varð hann heimsmeistari ungmenna 20 ára og yngri í skák og hlaut um leið nafnbótina stórmeistari. Helgi hefur náð prýðis árangri á alþjóðlegum mótum, deildi t.d. efsta sætinu á Politiken Cup í Kaupmannahöfn árið 1997 og var á meðal efstu manna á Reykjavíkurskákmótunum 1994 og 2002. Hann hafnaði fjórum sinnum í öðru sæti í landsliðsflokki á Skákþingi Íslands, síðast árið 2004, og varð skákmeistari Taflfélags Reykjavíkur tvö ár í röð, 1991 og 1992. Helgi varð tvívegis Íslandsmeistari í atskák og hefur einnig tvívegis orðið hraðskákmeistari Íslands, síðast árið 2006. Þá náði hann tvisvar sinnum 2. sæti á heimsmeistaramótum barna- og unglinga, u-14 árið 1991 og u-16 árið 1993. Helgi varð þrefaldur Norðurlandameistari í einstaklingskeppni í skólaskák, síðast árið 1992, og er margfaldur Íslandsmeistari barna- og unglinga frá árunum 1988-1993. Loks má geta þess að Helgi hefur fjórum sinnum teflt fyrir hönd þjóðar sinnar Ólympíumótinu í skák.

  
Helgi Áss Grétarsson: “Sú blanda af samheldni,  glaðværð og fræðimennsku sem einkennir félagið veldur miklu um ákvörðun mína að ganga því á hönd. Ég hlakka til að leggja mitt af mörkum í þessum öfluga hópi.“

 

Stjórn og liðsmenn Goðans bjóða Helga Áss Grétarsson velkominn í sínar raðir.  

 

Íslandsmeistarinn vígður inn í Goðann.

Liðsmenn Goðans og velunnarar á höfuðborgarsvæðinu áttu saman skemmtilega stund sl. miðvikudagskvöld. Nýjasti liðsmaður Goðans, Íslandsmeistarinn Þröstur Þórhallsson, var tekinn formlega inn í félagið með viðeigandi ávarpi og lófataki. Að vígslu lokinni flutti Þröstur áhugavert erindi um einvígi sitt við Braga Þorfinnsson, þar sem hann rakti skákirnar með skýringum, reifaði atburðarásina „bak við tjöldin“ og henti á lofti skarplegar ábendingar félaga sinna.

 

Einar Hjalti Jensson,  fræðameistari Goðans, afhendir Þresti Þórhallssyni keppnistreyju félagsins. Gullregnið í bakgrunni er vel við hæfi enda aðstoðaði Einar Hjalti Þröst í einvíginu um Íslandsmeistartitilinn.

 

Í veitingahléi var farið yfir stöðu mála fyrir átökin í 1. deild á komandi leiktíð. Það leyndi sér ekki að mikill hugur er í köppum Goðans sem munu verja nýfengið sæti sitt meðal bestu skáksveita landsins af harðfylgi.

 

Tómas og Jón efstir á útiskákmóti Goðans.

Tómas Veigar Sigurðarson TV og Jón Kristinn Þorgeirsson SA, urðu hlutskarpastir á útiskákmóti Goðans sem halið var við Goðafoss í Þingeyjarsveit í gærkvöld. Þeir komu jafnir í mark með 8 vinninga af 9 mögulegum. Tefld voru hraðskákir, einföld umferð og allir við alla. Alls mættu 10 skákmenn til leiks, en þar af voru einungis þrír frá Goðanum. Akureyringar fjölmenntu hinsvegar á mótið líkt og þeir gerðu í Vaglaskógi í fyrra.

 
Frá skákstað í gærkvöld. Goðafoss í baksýn.

 Lokastaðan:

1-2. Tómas Veigar Sigurðarson   8 af 9
1-2. Jón Kristinn Þorgeirsson     8
3.    Sigurður Arnarson                6
4.    Sigurður Ægisson                 5,5
5.    Hjörleifur Halldórsson           4,5 
6.    Rúnar Ísleifsson                    4
7.    Andri Freyr Björgvinsson       3,5
8.    Sigurður Eiríksson                 2,5
9.    Sigurbjörn Ásmundsson        2
10.  Hermann Aðalsteinsson        1

 
Kuldalegir skákmenn í gærkvöld.

Aðstæður voru sæmilegar í gærkvöld. þurrt í veðri og nánst logn, en hitsastigð var ekki nema 7 gráður í +. 

Útiskákmót Goðans við Goðafoss annað kvöld.

Hið árlega útiskákmót Goðans verður haldið annað kvöld, föstudagskvöld kl 20:30 við Goðafoss. (Bílaplanið við fossinn) Tefldar verða 5 mín skákir allir við alla.

Ekkert þáttökugjald og engin verðlaun, bara gaman saman.

Félagar fjölmennið á mótið.

Stjórnin. 

Íslandsmeistarinn í skák gengur til liðs við Goðann !

Þröstur Þórhallsson, stórmeistari og nýbakaður Íslandsmeistari í skák, hefur gengið til liðs við skákfélagið Goðann. Vart þarf að orðlengja að félaginu er mikill akkur í liðsinni svo öflugs skákmeistara, ekki síst í ljósi þess að hin eitilharða A-sveit Goðans þreytir frumraun sína meðal bestu skáksveita landsins í 1. deild Íslandsmótsins á næstu leiktíð. Hermann Aðalsteinsson, formaður Goðans: „Okkur er í senn heiður og styrkur að komu Íslandsmeistarans í okkar raðir og hlökkum til að njóta snilldar hans, reynslu og þekkingar. Með inngöngu Þrastar í Goðann færumst við nær því markmiði að festa Goðann í sessi meðal fremstu skákfélaga á landinu.“  

 

Þröstur Þórhallsson Íslandsmeistari í skák 2012.

 

Skákferill Þrastar er langur og afrekin mörg. Hann var útnefndur alþjóðlegur stórmeistari í skák árið 1996. Fyrsta áfanganum náði Þröstur í Gausdal í Noregi árið 1991 og annar áfanginn vannst í Oakham í Englandi árið 1994. Þriðji áfanginn kom strax í kjölfarið með sigri á Péturs Gauts mótinu í Gausdal árið 1995 en meðal þátttakenda þar voru kunnir kappar á borð við Margeir Pétursson og Emil Sutovsky sem Þröstur lagði eftirminnilega.

 

Þröstur hefur orðið Reykjavíkurmeisari í skák alls 6 sinnum og hefur einnig áunnið sér titilinn haustmeistari TR nokkrum sinnum. Hann er margfaldur Norðurlandameistari í skólaskák, bæði í keppni sveita og einstaklinga, en þann titil vann hann fyrstur Íslendinga er hann sigraði í flokki 11-12 ára árið 1982 í Asker í Noregi. Þröstur varð einnig þrásinnis Íslandsmeistari í skólaskák með sveitum Hvassaleitisskóla, Verslunarskóla Íslands og Menntaskólans í Hamrahlíð. Hann hefur teflt alls 9 sinnum fyrir Íslands hönd á Ólympíuleikunum í skák og stefnir að því að tefla í 10 skiptið fyrir hönd þjóðar sinnar á Ólympíuleikunum í Istanbul í haust, en Þröstur vann sér sæti í landsliðinu með sigrinum í Íslandsmótinu á dögunum.

 

Þröstur Þórhallsson: ´“Ég hef hrifist af uppgangi Goðans á undanförnum misserum, því skemmtilega félagsstarfi sem þar fer fram og góðum liðsanda. Einnig er mikil rækt lögð við skákfræðin undir forystu Einars Hjalta Jenssonar, sem aðstoðaði mig einmitt í einvíginu um Íslandsmeistaratitilinn. Ég hlakka til að leggja mitt af mörkum í hópi vaskra skákmanna Goðans sem ég þekki marga hverja mjög vel allt frá unglingsárum".    

 

Stjórn og liðsmenn Goðans bjóða Þröst Þórhallsson velkominn í sínar raðir.   

Ný Íslensk skákstig komin út. Einar bætir 70 stigum við sig.

Ný Íslensk skákstig eru komin út. Þau gilda 1. júní. Eins og við var að búast hækkar Einar Hjalti Jensson langmest allra eða um heil 70 stig og er þar með orðin næst hæstur félagsmanna. Benedikt Þorri hækkar um 30 stig, Hermann um 13 og Jakob Sævar bætir við sig 10 stigum. Nokkrir hætta um 1-9 stig frá síðasta lista. Aðrir standa í stað eða lækka á stigum.

 

Nafn	1. júní	1. mars	+/-	skákir
Sigurður Daði Sigfússon	2345	2356	-11	987
Einar Hjalti, Jensson	2295	2225	70	484
Ásgeir Páll, Ásbjörnsson	2292	2313	-21	198
Þröstur, Árnason	2258	2250	8	452
Kristján, Eðvarðsson	2210	2203	7	854
Hlíðar Þór, Hreinsson	2188	2185	3	469
Björn, Þorsteinsson	2182	2175	7	810
Tómas, Björnsson	2131	2129	2	1026
Jón, Þorvaldsson	2086	2096	-10	127
Ragnar Fjalar, Sævarsson	1935	1935	0	250
Páll Ágúst, Jónsson	1910	1905	5	132
Sigurður J, Gunnarsson	1877	1889	-12	75
Pétur, Gíslason	1795	1795	0	44
Barði, Einarsson	1755	1755	0	37
Hallur Birkir, Reynisson	1740	1740	0	3
Benedikt Þorri, Sigurjónsson	1717	1687	30	26
Jakob Sævar, Sigurðsson	1693	1683	10	176
Sveinn, Arnarsson	1687	1723	-36	147
Rúnar, Ísleifsson	1671	1695	-24	176
Smári, Sigurðsson	1671	1665	6	91
Baldur, Daníelsson	1642	1642	0	85
Helgi, Egilsson	1580	1580	0	37
Heimir, Bessason	1528	1528	0	81
Sigurjón, Benediktsson	1508	1520	-12	65
Ævar, Ákason	1453	1467	-14	94
Ármann, Olgeirsson	1413	1413	0	47
Benedikt Þór, Jóhannsson	1409	1409	0	24
Hermann, Aðalsteinsson	1349	1336	13	61
Snorri, Hallgrímsson	1326	1323	3	48
Sighvatur, Karlsson	1318	1318	0	48
Sigurbjörn, Ásmundsson	1199	1201	-2	46
Sæþór Örn, Þórðarson	1170	1170	0	6
Valur Heiðar, Einarsson	1154	1154	0	24
Hlynur Snær, Viðarsson	1075	1096	-21	39

 

Reiknuð mót voru m.a. Deildarkeppnin á Selfossi, Reykjavík Open, áskorendaflokkur, landsliðsflokkur og landsmótið í skólaskák.

 

Sjá allan listann hér fyrir neðan.

 

 

Skrár tengdar þessari bloggfærslu:

• Ísl stig 1. júní 2012

Vel heppnað skemmtikvöld Goðans

Liðsmenn Goðans og velunnarar á höfuðborgarsvæðinu komu saman til léttrar æfingar á miðvikudagskvöld þar sem áherslan var sem fyrr á góðan félagsskap, góðar veitingar og góða taflmennsku. Skemmtikvöldið hófst með því að Kristján Eðvarðsson hélt vandaðan og áhugaverðan fyrirlestur um strategíska hugsun í byrjunum og svaraði fimlega skarplegum athugasemdum félaga sinna.

                    Kristján Eðvarðsson í Reykjavík Open.

Að afloknu veitingahléi var efnt til hraðskákmóts þar sem 10  öflugir  skákmenn tókust á. Að þessu sinni vann Einar Hjalti Jensson glæstan sigur, hlaut 8,5 vinninga af 9 mögulegum og leyfði aðeins jafntefli gegn Ásgeiri P. Ásbjörnssyni sem varð annar. Í  3.-4. sæti urðu Jón Þorvaldsson og Sigurður Daði Sigfússon en Tómas Björnsson hafnaði í 5. sæti. Vígmóðir en vel saddir héldu keppendur síðan út í vornóttina, staðráðnir í því að eflast enn frekar á hvítum reitum og svörtum.
Jón Þ. 

Irina Krush bandarískur skákmeistari kvenna.

Irina Krush (2457) varð í gær bandarískur skákmeistari kvenna.  Hún vann Anna Zatonskih (2510) í úrslitaeinvígi 2-0 en þær höfðu komið jafnar í mark á sjálfu aðalmótinu með 7 vinninga í 9 skákum.  Rusudan Goletiani (2333) varð í þriðja sæti með 5½ vinning.

Irina Krush í Reykjavík Open í mars sl. Mynd; Hrafn Jökulsson.

Irina gekk til liðs við Goðann í mars sl. og er hún því annar landsmeistari Goðans í skák, en Björn Þorsteinsson varð Íslandsmeistari í tvígang á sínum tíma. 

• Heimasíða mótsins

Tómas vann sigur á hraðskákmóti Öðlinga.

Hraðskákmót öðlinga 2012 fór fram í nýlega og varð Tómas Björnsson hlutskarpastur með 6 vinninga af 7 mögulegum. Næstir urðu Gunnar Freyr Rúnarsson með 5½ vinning og Þorvarður Fannar Ólafsson með 5 vinninga.  Í mótshléi var boðið upp á glæsilegar veitingar í boði Birnu Halldórsdóttur.

 

Lokastaða efstu manna:                                                          

 1. Tómas Björnsson,                        6        21.5
 2   Gunnar Freyr Rúnarsson,              5.5      21.0
 3   Þorvarður Fannar Ólafsson,          5        19.0
 4-5  Þór Valtýsson,                            4.5      19.5
     Pálmi R. Pétursson,                       4.5      17.5     

Stigamót Hellis. Einar Hjalti í öðru sæti.

Davíð Kjartansson sigraði á Stigamóti Hellis sem lauk í gærkvöldi. Davíð fékk 6,5 vinning í sjö skákum og gerði aðeins eitt jafntefli við Einar Hjalta Jensson sem kom næstur í 2. sæti með 6 vinninga. Þessir tveir keppendur voru skáru sig nokkuð frá öðrum keppendum á mótinu en jafnir í 3. og 4. sæti voru Vigfús Ó. Vigfússon og Oliver Aron Jóhannesson með 4,5 vinning. 

Lokastaða efstu manna. 

Röð	Nafn	Stig	Vinn.	TB1	TB2	TB3
1	Kjartansson David	2320	6,5	31	22	28,5
2	Jensson Einar Hjalti	2303	6	30	21	24,3
3	Vigfusson Vigfus	1994	4,5	28	20	14,3
4	Johannesson Oliver	2050	4,5	27	19	13,5
5	Ragnarsson Dagur	1903	4	29	21	12
6	Thoroddsen Arni	1653	4	23	17	11,5

Stigamót Hellis. Einar Hjalti efstur eftir fjórar umferðir.

Eftir fyrstu fjórar umferðirnar á Stigamóti Hellis eru Davíð Kjartansson (2320) og Einar Hjalti Jensson (2303) efstir og jafnir með 3,5 vinning en þeir gerðu jafntefli í innbyrðis viðureign sinni í fjórðu umferð. Næstir koma svo Daði Ómarsson og Vigfús Vigfússon með 3 vinninga.  Fimmta umferð hófst kl. 11 en síðari kappskák dagsins hefst kl. 17.

Staðan efstu manna eftir 4 umferðir:

Nr.	Nafn	Stig	Vinn.	TB1	TB2	TB3
1	Jensson Einar Hjalti	2303	3,5	10	5,5	8,3
2	Kjartansson David	2320	3,5	10	4,5	8,3
3	Omarsson Dadi	2204	3	7,5	4	5
4	Vigfusson Vigfus	1994	3	7	3	3,5
5	Sigurdsson Birkir Karl	1728	2,5	10	5,5	5,3
6	Johannesson Oliver	2050	2,5	9	5	4,3
7	Hardarson Jon Trausti	1762	2,5	7	3,5	3,3
8	Jonsson Tomas Arni	0	2,5	6	3	2,8

Sigurður Daði í 4. sæti á Öðlingamótinu.

Sigurður Daði Sigfússon endaði í 4. sæti á Öðlingamótinu sem lauk nýlega. Þorvarður Fannar Ólafsson vann sigur með 6 vinningum.

 

 

 

Staða efstu manna. 

 

Rk.		Name	FED	Rtg	Club/City	Pts.	TB1	TB2	TB3
1		Olafsson Thorvardur	ISL	2175	Haukar	6.0	30.0	21.5	25.25
2		Palsson Halldor	ISL	2000	TR	5.0	27.0	19.0	19.25
3		Isolfsson Eggert	ISL	1891	TR	5.0	25.5	19.0	17.75
4	FM	Sigfusson Sigurdur	ISL	2346	Godinn	4.5	31.5	22.5	18.50
5		Hjartarson Bjarni	ISL	2038	TV	4.5	26.5	18.5	15.00
6		Valtysson Thor	ISL	1973	SA	4.5	25.0	17.5	16.00
7		Saemundsson Bjarni	ISL	1947	UMSB	4.5	23.5	17.0	13.25
8		Sigurjonsson Siguringi	ISL	1944	TR	4.5	23.5	16.5	11.50