Íslandsmót skákfélaga. Pistill formanns.

Þá er fyrri hluta íslandsmóts skákfélaga lokið. Goðinn tefldi fram þremur liðum í keppninni í fyrsta sinn og verður fjallað um frammistöðu B og C-liðsins í þessum pistli. Jón þorvaldsson liðstjóri A-liðs Goðans er búinn að gera Frammistöðu A-liðsins góða skil.

 

B-liðið í þungum þönkum. Pétur, Sveinn, Rúnar, Jakob, Smári og Benedikt.

Frammistaða B-liðsins var ágæt en líklega dugar hún ekki til þess að B-liðið komist upp í 3. deild í vor því liðið hefur einungis 4 stig (MP) og 14,5 vinninga í 7. sæti, en tvö efstu liðið hafa 8 stig og næstu fjögur hafa 6 stig. Þrjú efstu liðin vinna sig upp um deild, þannig að líkurnar eru hverfandi. 6 stig eru eftir í pottinum og þurfa allar viðureignir að vinnast sem eru eftir og svo þarf að treysta á hagstæð úrslit úr öðrum viðureignum. C-liðið stóð sig vonum framar og er það með 4 stig eins og B-liðið, með 12,5 vinninga.

  

C-liðið. Sighvatur, Snorri, Bjössi, Valur og Hlynur. (Hermann tók myndina) 

Staða efstu liða í 4. deild þegar þrjár umferðir eru eftir.

1. Sauðárkrókur 8 MP og 17 vinningar
2. Fjönir-B          8            15,5
3. UMSB             6            18
4. SFÍ                6             16,5
5. TR-D              6             16
6. SAUST           6             14
7. Goðinn-B       4             14,5
13. Goðinn-C     4             12,5

Alls taka þátt 23 lið í 4. deildinni í ár.   Sjá nánar hér:
http://chess-results.com/tnr38868.aspx?art=0&lan=1&m=-1&wi=1000

Árangur B-liðsins.

Goðinn - B  - Fjölnir-D 
B-sveitin vann sigur 5,5-0,5. Pétur, Rúnar, Jakob, Smári og Benedikt Þorri unnu sína andstæðinga en Sveinn gerði jafntefli.

Goðinn - B-  TR-E 
B-sveitin vann stóran 6-0 sigur á TR- E í annarri umferð. Sveinn, Rúnar, Jakob, Smári, Benedikt og Hermann tefldu

Goðinn - B -  SFÍ
B-sveitin tapaði 1-5 fyrir SFÍ í þriðju umferð. Jakob og Smári gerðu jafntefli, en Rúnar, Benedikt, Hermann og Sighvatur töpuðu. Vart var við öðru að búast því allir tefldu töluvert upp fyrir sig og þó sérstaklega Rúnar.

Goðinn - B  -   TR-D
B-liðið tapaði 2-4 fyrir TR-d í 4. umferð. Full stórt tap. Benedikt Þorri vann sína skák. Sveinn gerði jafntefli á fyrsta borði og Jakob sömuleiðis. Rúnar, Smári og Hermann töpuðu.

Árangur C-liðsins

Goðinn - C - TR-E
C-sveitin gerði 3-3 jafntefli við E-sveit TR, þar sem Valur, Sighvatur og Hermann unnu sínar skákir, en Sigurbjörn, Snorri og Hlynur töpuðu.

Goðinn - C -   Hellir- E
C-sveitin tapaðu naumlega fyrir 2,5-3,5 fyrir Helli-e. Valur Heiðar vann sína skák létt þegar sími andstæðingsins hringdi snemma í skákinni og Viðar Hákonarson vann sína fyrstu skák á 6. borði. Hlynur Snær gerði jafntefli. Snorri, Bjössi og Sighvatur töpuðu.

Goðinn - C  -   Fjölnir - D
C-liðið vann svo Fjölni -d 4-2 í 3. umferð. Valur, Bjössi, Viðar og Andri Valur unnu sínar skákir, en Snorri og Hlynur töpuðu.

Goðinn - C  -  TV-D
C-liðið gerði 3-3 jafntefli við TV-d. Sighvatur og Viðar unnu mjög auðvelda sigra, því andstæðingar þeirra mættu ekki til leiks. Bjössi og Hlynur gerðu jafntefli, en Snorri og Valur töpuðu.

Frammistaða einstakra liðsmanna.

Pétur Gíslason tefldi eina skák á 1. borði í B-liðinu og vann hana frekar létt. Hann hefur það" næs" á Spáni núna og slær litlar hvítar kúlur með kylfu.

 

 

 

Sveinn Arnarson tefldi þrjár skákir vann eina og gerði tvö jafntefli

 

 

 

 

 

 

Rúnar Ísleifsson tefldi 4 skákir. Hann vann tvær skákir en tapaði tveimur og annarri þeirra gegn Sigurði Daða Sigfússyni.

 

 Jakob Sævar Sigurðsson tefldi 4 skákir. Jakob vann tvær skákir og gerði tvö jafntefli.

 

Smári Sigurðsson tefldi 4 skákir. Vann tvær skákir, gerði eitt jafntefli og tapaði einni skák.

 

 

 

 

Benedikt Þorri Sigurjónsson tefldi 4 skákir. Benedikt vann 3 skákir en tapaði einni. Mjög góð frammistaða hjá Benedikt þegar haft er í huga að hann hafði ekkert teflt í hartnær tvö ár eftir dvöl í Afríku og var því hreint ekki í æfingu.

Hermann Aðalsteinsson. Tefldi 3 skákir með B-liðinu. Hann vann eina en tapaði tveimur. Hermann tefldi eina skák í C-liðinu og vann hana eftir að hafa haft gjörtapaða stöðu um tíma.

 

Sighvatur Karlsson. Tefldi 4 skákir. Sighvatur vann eina skák en tapaði tveimur. Svo fékk hann einn vinning gefins í síðustu umferð því að andstæðingurinn mætti ekki til leiks.

Snorri Hallgrímsson tefldi 4 skákir og tapaði þeim öllum. Snorra gekk illa í mótinu og var langt frá sínu besta.

 

 

Sigurbjörn Ásmundsson tefldi 4 skákir. Bjössi tapaði fyrstu tveimur skákunum, en vann þá þriðju og gerði jafntefli í þeirri fjórðu.

 

 

 

Valur Heiðar Einarsson. Valur tefldi 4 skákir. Valur vann þrjár skákir og vannst ein af þeim á Vodaphone-gammbítnum fræga. Valur tapaði einni skák. Flott frammistaða hjá Val.

 

 

 

Hlynur Snær Viðarsson. Hlynur tefldi 4 skákir. Hlynur gerði tvö jafntefli en tapaði tveimur. Hlynur átti vinning vísan í síðust umferð, en stóð uppi með biskup  gegn kóngi og varð að sættast á jafntefli.

Viðar Hákonarson tefldi 3 skákir. Hann kom inn sem varamaður í 2. umferð. Viðar gerði sér lítið fyrir og vann allar skákirnar, en þá síðustu af því að enginn andstæðingur var til staðar. Mjög flott frammistaða hjá Viðari.

 

Andri Valur Ívarsson tefldi 1 skák. Andri Valur var kallaður inn í C-liðið í 3. umferð. Andri, líkt og Viðar, hafði ekki teflt kappskák áður, en það kom ekki að sök. Andir mátaði andstæðing sinn á hálftíma. Andri hefur verðir iðinn við kolann hjá Völsungi í sumar og skorað slatta að mörkum. Hann getur greinilega líka "skorað" við skákborðið.

 

 

 

 

Alls tefldu 20 skákmenn fyrir Goðann að þessu sinni. Aldrei áður hafa svo margir teflt fyrir Goðann á Íslandsmóti í skák. 

Að lokum vill formaður þakka öllum liðsmönnum félagsins kærlega fyrir þátttökuna í mótinu. Margir lögðu talsvert á sig til þess að hægt væri að stilla upp þremur liðum og eiga þeir allar hinar bestu þakkir skilið fyrir.

Hermann Aðalsteinsson. 

A-sveit Goðans taplaus á Íslandsmótinu. Liðsstjóra pistill.

Jón Þorvaldsson liðsstjóri A-liðs Goðans skrifaði pistil um frammistöðu A-liðsins í fyrri hluta Íslandsmóts skákfélaga sem er birtur hér fyrir neðan í heild sinni. Pistill frá formanni er væntanlegur í kvöld eða á morgun. 

Helgina 8. - 10 . okt. þreytti A-sveit Goðans frumraun sína í 3. deild Íslandsmóts skákfélaga og stóð sig með sóma. Goðinn hafði safnað vösku liði  enda uggði menn að þriðja deildin yrði mun strembnari Herðubreið að klífa en sú fjórða, sem og kom á daginn. Kapparnir Ásgeir P. Ásbjörnsson, Einar Hjalti Jensson,  Björn Þorsteinsson og Tómas Björnsson höfðu gengið til liðs við Goðann fyrir þessa leiktíð en fyrir voru kempurnar Sigurður J. Gunnarsson, Sindri Guðjónsson og Jón Þorvaldsson, liðsstjóri.

 

Ásgeir, Hermann, Hlynur, Valur, Smári, Sindri, Pétur, Rúnar, Benedikt, Jakob, Bjössi, Sigurður, Björn, Sighvatur, Tómas, Einar og Jón gestgjafi. Svein, Snorra, Viðar og Andra vantar á myndina. 

Undirbúningur var góður. Keppendur höfðu æft saman um nokkurra vikna skeið undir öruggri stjórn þjálfara liðsins, Einars Hjalta, farið yfir valdar byrjanir og eflt með sér liðsanda undir forystu Tómasar Björnssonar. Lokahnykkur undirbúningsins var svo föstudagsdaginn 8. okt.  þegar liðsmenn Goðans úr öllum þremur sveitunum hittust yfir léttum málsverði.

 

Léttur kvöldverður fyrir átökin á föstudaginn. 

Mannýgir hrútar

Það var glatt á hjalla þessa síðdegisstund en skemmtilegu samneyti lauk með orðum formannsins, Hermanns Aðalsteinssonar, sem eggjaði menn til dáða, gráa fyrir járnum. Í bálokin gall við í einum árvökulum félaganum að umfram allt skyldu menn vara sig á bévítis gemsunum og helst umgangast þá eins og mannýga hrúta.  Vissast væri  slökkva á þeim strax, taka rafhlöðurnar úr,  geyma gemsana í bílunum og leggja a.m.k. 100 metrum frá skákstaðnum. Slík væri váin. Síst mætti henda að góðri taflmennsku væri spillt með jarmandi gemsa sem leiddi beint til taps, viðkomandi skákmanni til hneisu og öðrum keppendum til armæðu og hugmyndateppu.

 

Goðinn - Sf Vinjar í 1. umf. Einar, Björn, Tómas, Sigurður og Sindri. 

Í fyrstu umferð á föstudagskvöldið var tekist á við skákfélagið Vinjar. Þeir kappar eru margreyndir og ólseigir en góður sigur hafðist að lokum, 5 - 1, sem skaut Goðanum rakleiðis í 2. sætið. Í fyrri umferðinni á laugardeginum var röðin komin að B sveit KR sem var ein allra sterkasta sveitin í 4. deildinni í fyrra. Eftir snarpa viðureign hafðist sigur, 4 - 2, en óvænt tap á báðum neðstu borðum kom í veg fyrir enn stærri sigur.

Spennan magnast

Spennan magnaðist og síðari viðureign dagsins var sannkallaður stórislagur gegn hinum snjöllu og vöðvastæltu liðsmönnum Víkingasveitarinnar. Sveitirnar eru nánast hnífjafnar  í skákstigum talið og svo römm var viðureignin að brakaði í hverju borði enda ekki við öðru að búast þegar goðar og víkingar reyna með sér í rammheiðnum anda.  Niðurstaðan varð 3 - 3 þar sem jafnt var á öllum borðum nema hvað Ásgeir lagði sinn andstæðing á 1. borði á afar sannfærandi hátt en skákin á 6. borði tapaðist örugglega. Sigur Ásgeirs gegn hinum öfluga Fide meistara Davíð Kjartanssyni var þeim mun athyglisverðari þar sem sá síðarnefndi sá aldrei til sólar í skákinni. Slík var snilld Ásgeirs sem fyrir þetta mót hafði ekki komið nálægt keppnisskák í fjölda ára. Mikill fengur er fyrir íslenska skákíþrótt að fá Ásgeir aftur að reitunum hvítu og svörtu.

 

Goðinn- Víkingaklúbburinn. Ásgeir með hvítt gegn Davíð Kjartanssyni.

Í lokaumferðinni á sunnudag tefldi Goðinn við A-sveit Garðabæjar sem var í efsta sæti fyrir umferðina, stigi á undan okkar mönnum. Líkt og í viðureigninni við Víkingasveitina var sennan afar hörð og niðurstaðan aftur jafntefli. Nú varð það hinn margfaldi Íslandsmeistari, Reykjavíkurmeistari og Ólympíufari Björn Þorsteinsson sem hélt uppi heiðri Goðans með góðum endataflssigri á hinum ágæta skákmanni Jóni Þór Bergþórssyni en skákin á 6. borði tapaðist þó að vænlega horfði þar framan af.

 

              Tómas Björnsson og Björn Þorsteinsson. 

Að loknum fjórum umferðum eru sveit Garðbæinga og Víkingasveitin jafnar í efsta sæti með 7 stig og en þessar sveitir leiða saman riddara sína í 5. umferðin í mars nk. Í 3-5. sæti eru svo B sveit Vestamannaeyinga, B sveit Akureyringa og Goðinn með 6 stig en þessar fimm sveitir munu greinilega berjast til þrautar um tvö efstu sætin sem veita rétt til keppni í 2. deild leiktíðina 2011 - 2012.

 

                    Sindri Guðjónsson og Sigurður Jón Gunnarsson.

Góð liðsheild

Um frammistöðu einstakra liðsmanna er það að segja að Ásgeir og Björn fóru á kostum, hlutu hvor um sig 3,5 vinninga af 4. Einar Hjalti  og Tómas voru líka mjög öflugir, skiluðu sveitinni 3 vinningum af 4 hvor. Jón tefldi upp á öryggið og gerði jafntefli í báðum sínum skákum. Hinir snjöllu skákmenn Sigurður Jón og Sindri voru fjarri sínu besta að þessu sinni enda báðir langþreyttir eftir mikla vinnu vikurnar fyrir mótið. Það sem öllu skiptir er að heildarframmistaða Goðans var mjög góð og geta keppendur og stuðningsmenn sannarlega hlakkað til spennandi úrslitaumferða á næsta ári.

 

                 Einar Hjalti Jensson og Ásgeir Ásbjörnsson. 

Keppendum Goðans er þökkuð vasklega framganga og keppinautum Goðans þökkum við drengilega keppni og skemmtileg viðkynni. Jafnframt er ástæða er til að þakka forseta Skásambands Íslands, Gunnari Björnssyni, og starfsmönnum mótsins fyrir góða skipulagningu og þá miklu vinnu sem þarf til að hið fjölmenna Íslandsmót skákfélaga gangi snurðulaust fyrir sig. Þá er sérstök ástæða til að þakka Helga Árnasyni, skólastjóra Rimaskóla, fyrir að leggja skákmönnum til prýðilega aðstöðu til iðkunar þessarar merku íþróttar hugans sem nýtur vaxandi og verðskuldaðrar lýðhylli.

Jón Þorvaldsson liðsstjóri A-liðs Goðans.

Goðinn í 3-5 sæti.

A-lið Goðanser í 3-5 sæti í 3. deild með 6 stig og 15 vinninga að afstöðnum fyrri hluta Íslandsmóts skákfélaga. A-lið Víkingaklúbbsins leiðir 3. deildina með 7 stig og 17,5 vinninga. A-liðið gerði 3-3 jafntefli við A-lið Taflfélags Garðabæjar í spennandi viðureign. Björn þorsteinsson vann sinn andstæðing, Ásgeir, Einar,Tómas og Jón gerðu jafntefli, en Sigurður tapaði. 

B-lið Goðans er í 7 sæti með 4 stig og 14,5 vinninga og C-liðið er í 13 sæti með 4 stig og 12,5 vinninga. B-liðið tapaði í dag 2-4 fyrir TR-d. C-liðið gerði 3-3 jafntefli við TV-d  

Seinni hlutinn verður tefldur dagana 4-5 mars 2011.  Þá mætir A-lið Goðans B-liði Skákfélags Akureyrar í 5. umferð. B-liðið mætir skákfélaginu Æsir og C-liði keppir við Fjölni - C

Staðan í 3.deild
http://chess-results.com/tnr38867.aspx?art=0&lan=1&m=-1&wi=1000

Staðan í 4. deild
http://chess-results.com/tnr38868.aspx?art=0&lan=1&m=-1&wi=1000

Íslandsmóti skákfélaga verður gerð skil í pistli formanns á morgun og þá verða birtar myndir frá mótinu.

Skin og skúrir í dag.

Tvær umferðir voru tefldar í dag á íslandsmóti skákfélaga. A-sveit Goðans vann sigur á KR-b í annari umferð 4-2. Ásgeir, Einar, Björn og Tómas unnu, en Sigurður og Sindri töpuðu. A-sveitin gerði svo 3-3 jafntefli við A-sveit Víkingaklúbbsins í 3. umferð. Frábær úrslit gegn sterkri sveit.
Ásgeir Ásbjörnsson vann afar glæsilegan sigur á Davíð Kjartanssyni á fyrsta borði. Einar, Björn, Tómas og Jón Þorvaldsson gerðu jafntefli en Sindri tapaði. 

Ásgeir Ásbjörnsson (t,v) vann Davíð Kjartansson í dag. Ásgeir hefur unnið allar skákirnar í mótinu sem er frábær árangur. Ásgeir hefur engu gleymt þó svo að hátt í 30 ár séu liðin frá því að hann tefldi kappskák síðast.

B-sveitin vann stóran 6-0 sigur á TR- í annari umferð.. Sveinn, Rúnar, Jakob, Smári, Benedikt og Hermann tefldu. B-sveitin tapaði svo 1-5 fyrir SFÍ í þriðju umferð. Jakob og Smári gerðu jafntefli, en Rúnar, Benedikt, Hermann og Sighvatur töpuðu.

Viðar Hákonarson hefur unnið báðar skákir sínar í dag, en hann tefldi fyrir C-liðið.

C-sveitin töpuðu naumlega fyrir 2,5-3,5 fyri Helli-e. Valur Heiðar vann skák létt þegar sími andstæðingsins hringdi snemma í skákinni og Viðar Hákonarson vann sína fyrstu skák á 6. borði. Hlynur Snær gerði jafntefli. Snorri, Bjössi og Sighvatur töpuðu. C-liðið vann svo Fjölni -d 4-2 í 3. umferð. Valur, Bjössi, Viðar og Andri Valur unnu sínar skákir, en Snorri og Hlynur töpuðu.

Valur Heiðar Einarsson (í blárri skyrtu) er búinn að vinna allar sínar þrjár skákir. Valur og Ásgeir eru þeir einu sem eru með fullt hús vinninga. Andri Valur Ívarsson (í grárri peysu) tefldi eina skák sem varamaður í dag og vann hana að sjálfsögðu.

A-lið Goðans er í 3 sæti í 3 deild með 5 stig og 12 vinninga.
 http://chess-results.com/tnr38867.aspx?art=0&rd=3&lan=1&m=-1&wi=1000

B-liðið er í 5. sæti í 3-4. deild með 4 stig og 12,5 vinninga.
C-liðið er í 12. sæti með 3 stig og 9,5 vinninga.
http://chess-results.com/tnr38868.aspx?art=0&lan=1&m=-1&wi=1000

4. ufmerð verður tefld kl 11:00 á morgun sunnudag. A-liðið mætir A-liði Taflfélags Garðarbæjar. b-liðið mætir TR-d og C-liðið fær TV-d.

Góð byrjun hjá Goðanum.

Skáksveitir Goðans byrjuðu vel á Íslandsmóti skákfélaga sem hófst í gærkvöldi. A-sveit Goðans vann A-sveit Vinjar 5-1. Ásgeir, Einar Hjalti, Tómas, Björn og Sindri unnu sínar skákir, en Sigurður Jón tapaði.

B-sveitin vann sigur á Fjölni-D 5,5-0,5. Pétur, Rúnar, Jakob, Smári og Benedikt Þorri unnu sína andstæðinga og Sveinn gerði jafntefli.

C-sveitin gerði 3-3 jafntefli við E-sveit TR, þar sem Valur, Sighvatur og Hermann unnu sínar skákir, en Sigurbjörn, Snorri og Hlynur töpuðu.

Ekki er ljóst hverjir andstæðingar skáksveita Goðans verða í 2. umferð.

Íslandsmót skákfélaga hefst á morgun.

Íslandsmót skákfélaga, fyrri hluti, hefst kl 20:00 annað kvöld í Rimaskóla í Reykjavík.
Eins og kunnugt er teflir Goðinn fram þremur liðum í fyrsta skipti í sögu félagsins. 

A-liðið teflir í 3. deild og er A-liðið geysi sterkt að þessu sinni. Góðir möguleikar eru á því að A-liðið vinni sig upp í 2. deild í vor.

B-liðið er einnig nokkuð sterkt og ætti það að vera í toppbaráttunni í 3. deild.
Þess má til gamans geta að ritstjóri skák.is, Gunnar Björnsson, spáir A-liðinu öðru sæti í 3. deild og þar með farseðilinn upp í 2. deild. Sömuleiðis spáir Gunnar B-liðinu öðru sæti í 4. deild og þar með farseðilinn upp í 3. deild að ári.

C-liði er teflt fram í fyrsta skipti, enda hefur fjölgað mikið í félaginu síðustu mánuði og því mögulegt að stilla upp þremur liðum. Ekki er búist við því að C-liðið blandi sér í toppbaráttuna í 4. deild.

Enn fjölgar þátttökuliðum í Íslandsmóti skákfélaga, en 26 lið eru skráð til leiks í 4. deild og það þrátt fyrr að fjölgað hafi verið í 3. deild um 8 lið frá því í fyrra.
Ef ekki hefði komið til fjölgunar í 3. deild í vor hefðu 34 lið verið í 4. deildinni í ár.

Íslandsmótið er komið inn á chess-results. Þegar þetta er skrifað er ekki búið að para í 4. deild.

3. deildin. http://chess-results.com/tnr38867.aspx?art=0&lan=1&m=-1&wi=1000

4. deildin. http://chess-results.com/tnr38868.aspx?art=0&lan=1&m=-1&wi=1000

Sigur hjá Jakob

Jakob Sævar Sigurðsson  vann Herstein Heiðarsson í 4. umferð haustmóts SA sem fram fór í gærkvöldi. Jakob er í 4-5 sæti með 2,5 vinninga.

Nú verður gert stutt hlé á mótinu vegna Íslandsmóts skákfélaga, en 5. umferð verður tefld að viku liðinni. Þá mætir Jakob Mikael J Karlssyni með hvítu mönnunum.

Sjá skákina hér: http://www.skakfelag.blog.is/blog/skakfelag/entry/1103067/

Sigur hjá Jakob í dag.

Jakob Sævar Sigurðsson  vann Hauk Jónsson í 3. umferð Haustmóts SA sem fram fór í dag.  Jakob er með 1,5 vinninga í 6. sæti.

 

                          Jakob Sævar Sigurðsson.

4. umferð verður tefld á þriðjudagskvöld. Þá hefur Jakob svart gegn Hersteini Heiðarssyni.

Skoða skák Jakobs hér:
http://www.skakfelag.blog.is/blog/skakfelag/entry/1102002/   

Goðinn - Skákfélag Vinjar í 1. umferð.

A-lið Goðans  mætir Skákfélaginu Vinjar í 1. umferð Íslandsmóts Skákfélaga sem hefst 8. október nk. í Rimaskóla í Reykjavík. Dregið var um töfluröð í gær.

Viðureignir 1. umferðar:

TV – c   -  Víkingaklúbburinn – a

TR – c   -  TB – c

SA - b   -    KR – b

Hellir – c  -   TG – a

Goðinn – a  -  Sf. Vinjar

Hellir – d   -   TG – b

Haukar – c  -  TV – b

SA – c   -   SR – b

Töfluröð 3. deildar.

1. Víkingaklúbburinn – a

2. TR – c

3. KR – b

4. Hellir – c

5. Sf. Vinjar

6. Hellir – d

7. TV – b

8. SA – c

9. TV – c

10. TB – c

11. SA - b

12. TG – a

13. Goðinn – a

14. TG – b

15. Haukar – c

16. SR – b

Búast má við drætti í 4. deild 7. eða 8. október.

Pétur efstur á æfingu.

Pétur Gíslason  vann alla sína andstæðinga á skákæfingu kvöldsins er fram fór á Húsavík. Hann fékk 7 vinninga af 7 mögulegum. Umhugsunartíminn var 10 mín á hverja skák.

Úrslit kvöldsins:

1.     Pétur Gíslason                     7 vinn af 7 mögul.
2.     Smári Sigurðsson                 6
3.     Sighvatur karlsson               4
4.     Hermann Aðalsteinsson       3,5
5-6.  Valur Heiðar Einarsson        2,5
5-6. Snorri Hallgrímssson             2,5
7.     Hlynur Snær Viðarsson         1,5
8.     Sigurbjörn Ásmundsson       1

Næsta skákæfing verður á Laugum að viku liðinni.

Tap hjá Jakob í 2 umf.

Jakob Sævar tapaði fyrir Sigurði Arnarsyni í 2 umferð haustmóts Akureyrar sem fram fór í gærkvöld. 3. umferð verður tefld á sunnudagkl 14:00, en þá stýrir jakob hvítu mönnunum gegn Hersteini Heiðarssyni.

Sjá skák Jakobs hér:
http://www.skakfelag.blog.is/blog/skakfelag/entry/1100148/

 

Stúderingakvöldi frestað !

Skákstúderingakvöldi sem vera átti annað kvöld, hefur verið frestað um óákveðin tíma.

Þess í stað verður venjuleg skákæfing sem hefst kl 20:30 í Framsýnarsalnum á Húsavík.

Skákstúderingakvöld Goðans.

Á næstu skákæfingu sem verður nk. miðvikudagskvöld kl 20:30, verður sérstakt stúderingakvöld gegnum Skype. Stúderingarnar hefjast kl 20:30.  Það verður Einar Hjalti Jensson sem stjórnar stúderingunum úr Hafnarfirði og sendir þær norður til Húsavíkur.

Stúderingum Einars Hjalta verður varpað upp á tjald með skjávarpa á Húsavík svo að allir geti fylgst með þeim sem þar verða staddir. Félagar eru hvattir til þess að fjölmenna á þetta stúderingakvöld.

Vegna þessara stúderinga hefst hefðbundin skákæfing kl 19:30, þannig að skákþyrstir félagsmenn geta teflt í klukkutíma áður en stúderingarnar hefjast.
Skákæfingin verður í umsjá Smára Sigurðssonar.

Jafntefli hjá Jakob í 1. umferð.

Jakob Sævar Sigurðsson gerði jafntefli við Jón Kristinn Þorgeirsson í 1. umferð haustmóts SA í dag.

2. umferð verður tefld kl 19:30 á þriðjudag. Þá verður Jakob með svart gegn Sigurði Arnarsyni.

Hægt er að skoða skákirnar hér:
http://www.skakfelag.blog.is/blog/skakfelag/entry/1099329/   

Mótið á chess-results:
http://chess-results.com/tnr38551.aspx?art=2&lan=1&m=-1&wi=1000

Haustmót SA hefst í dag. Jakob Sævar meðal keppenda.

Hið árlega haustmótskákfélags Akureyrar hefst í dag kl 14:00. Mótið fer fram í félagsaðstöðu SA í íþróttahöllinni á Akureyri. Okkar maður, Jakob Sævar Sigurðsson, ætlar að taka þátt í mótinu.

1. umferð hefst kl 14:00 í dag, en dagskrá mótsins má sjá hér:
http://www.skakfelag.blog.is/blog/skakfelag/entry/1097786/

Lista yfir skráða keppendur má sjá hér:
http://www.skakfelag.blog.is/blog/skakfelag/entry/1098159/

Fylgst verður með gengi Jakobs Sævars hér á síðunni.

Stúdering landshorna á milli.

Á skákæfingu kvöldsinsá Stórutjörnum fór fram tilrauna-stúdering í gegnum skype sem heppnaðist afar vel.  Félagar í suð-vestur goðorði Goðans, með Einar Hjalta Jensson í fararbroddi, voru staddir í Hafnarfirði og sendu stúderingarnar í gegnum Skype norður yfir heiðar beint í tölvu á Stórutjörnum, þar sem félagar þeirra í heimahéraði Goðans, tóku við þeim af ákafa.
Ekkert var því teflt í kvöld heldur einungis stúderað. Ætlunin er að endurtaka leikinn á Húsavík að viku liðinni.

Ritstjóra er ekki kunnugt um að stúderingar með þessum hætti hafi áður farið fram á Íslandi. Reynslan frá því í gærkvöldi opna nýja möguleika fyrir skámenn til framtíðar öllum til heilla.

Páll Ágúst Jónsson , Tómas Björnsson, Björn Þorsteinsson, Sigurður Jón Gunnarsson, Jón þorvaldsson gestgjafi og Einar Hjalti Jensson stúderingasérfræðingur voru staddir í Hafnarfirðinum en þaðan voru stdúderingarnar sendar gegnum Skype norður yfir heiðar.

Sigurbjörn Ásmundsson, Ármann Olgeirsson og Hermann Aðalsteinsson voru staddir á Stórutjörnum og fylgdust með skjánum.

Þar sem um tilraun var að ræða var þessi stúderinga ekki auglýst sérstaklega, en þar sem hún heppnaðist mjög vel, verður efnt til stúderingakvölds á næstu skákæfingu sem fram fer í fundarsal Framsýnar-stéttarfélags á Húsavík nk. miðvikudagskvöld kl 20:30

Þeim stúderingum verður varpað upp á tjald með skjávarpa. Félagsmenn eru hvattir til þess að fjölmenna á fyrirhugað stúderingakvöld, en það verður auglýst nánar þegar nær dregur.  H.A.

Ný heimasíða hjá SA.

Skákfélaga Akureyrar  hefur opnað nýja heimasíðu, en hún er vistuð á moggablogginu eins og okkar síða, Skák.is og fleiri skáksíður.

 

 

 

 

 

 

 

Slóðin þangað er http://www.skakfelag.blog.is

Við óskum nágrönnum okkar í SA til hamigju með nýja heimasíðu.

Framsýn styrkir Goðann

Framsýn- stéttarfélag hefur samþykkt að koma myndarlega að starfi Skákfélagsins Goðans í vetur. Félagsvæði skákfélagsins eru Þingeyjarsýslurnar báðar og Húsavík. Þó er búseta á félagssvæðinu alls ekki skilyrði fyrir félagsaðild. Framsýn mun leggja skákfélaginu til aðstöðu í vetur í fundarsal stéttarfélaganna að Garðarsbraut 26 á Húsavík. Sérstakt skákmót, Framsýnarskákmótið, verður haldið 12. til 14. nóvember.

Að sögn Aðalsteins Á. Baldurssonar formanns Framsýnar er eitt af markmiðum félagsins að efla æskulýðs- og íþróttastarfsemi á félagssvæðinu. Liður í því væri að koma myndarlega að starfi Skákfélagsins Goðans. Hermann Aðalsteinsson formaður Goðans sagðist afar ánægður með framlag Framsýnar til starfsins hjá skákfélaginu. Styrkur Framsýnar hjálpaði til við að efla félagsstarfið enn frekar. Hann vildi einnig koma því á framfæri að það væru allir velkomnir í félagið og hvatti menn til að setja sig í samband við hann en Skákfélagið stendur fyrir reglulegum skákæfingum.

Heimir Bessason teflir hér við ungan skákmann en vetrarstarfið er hafið hjá Skákfélaginu Goðanum.

Hermann Aðalsteinsson formaður skákfélagsins er ánægður með samstarfið við Framsýn og telur það efla skákíþróttina í Þingeyjarsýslum.

Heimasíða Framsýn-stéttarfélags: http://www.framsyn.is

Smári 15 mín. skákmeistari Goðans 2010.

Smári Sigurðssonvann sigur á 15 mín skákmóti Goðans sem fram fór á Laugum í dag. Smári fékk 5 vinninga af 6 mögulegum og leyfði aðeins jafntefli gegn Rúnari og Hermanni í lokaumferðinni.  Rúnar Ísleifsson varð í öðru sæti og jafnir í 3-5 sæti urðu Jakob, Hermann og Sigurbjörn með 3,5 vinninga. Jakob fékk bronsverðlaunin á stigum. Valur Heiðar Einarsson vann yngri flokkinn.

 

Jakob Sævar, Valur Heiðar, Smári Sigurðsson 15 mín meistari og Rúnar Ísleifsson. 

NafnStig1234567VinningarSBStigabr.

1	Smári Sigurðsson	1745	*	½	½	1	1	1	1	5	12,25	20
2	Rúnar Ísleifsson	1755	½	*	1	0	½	1	1	4	9,25	-10
3	Hermann Aðalsteinsson	1515	½	0	*	½	1	½	1	3,5	8,5	31
4	Jakob Sævar Sigurðsson	1750	0	1	½	*	0	1	1	3,5	7,25	-26
5	Sigurbjörn Ásmundsson	1330	0	½	0	1	*	1	1	3,5	7	102
6	Ármann Olgeirsson	1540	0	0	½	0	0	*	1	1,5	1,75	-35
7	Valur Heiðar Einarsson	1410	0	0	0	0	0	0	*	0	0	-45

 

Þetta var þriðji sigur Smára á 15 mín móti Goðans frá upphafi en hann vann mótið 2007 og 2008. Jakob Sævar bróðir hans vann svo mótið í fyrra.

Skrár tengdar þessari bloggfærslu:

• 15 mín mótið

Benedikt Þór efstur á æfingu.

Benedikt Þór Jóhannsson kemur vel undan sumri því enginn stóðst honum snúning á skákæfingu kvöldsins er fram fór í nýuppgerðum sal stéttarfélagsins Framsýn á Húsavík nú í kvöld.
Benedikt Þór vann alla sína andstæðinga 6 að tölu. Tefldar voru skákir með 10 mín umhugsunartíma á mann.

Úrslit kvöldsins:

1.    Benedikt Þór Jóhannsson   6 vinn af 6 mögul.
2-3. Heimir Bessason                4
2-3. Hermann Aðalsteinsson     4
4.    Hlynur Snær Viðarsson       2,5
5.    Sigurbjörn Ásmundsson     2
6.    Valur Heiðar Einarsson       1,5
7.    Ingvar Björn Guðlaugsson  1

Næsta skákæfing verður á Stórutjörnum að viku liðinni.

Á laugardaginn kl 13:00 verður 15 mín mót Goðans haldið á Laugum. Félagsmenn eru hvattir til að taka þátt í því.  H.A.