Goðinn og Mátar sameinast !

Fréttatilkynning 7. sept. 2012

Skákfélagið Goðinn og Taflfélagið Mátar hafa tekið saman höndum og myndað með sér bræðralag.

Þannig renna félögin tvö nú  saman í eitt og ber hið sameinaða félag nafnið Goðinn-Mátar. Með þessum samruna verður til eitt af öflugustu skákfélögum landsins, grundvallað á sáttmála beggja félaga um góðan anda og gagnkvæma virðingu.

Skákfélagið Goðinn-Mátar mun væntanlega tefla fram einni sveit í 1. deild, einni í 3. deild og allt að fjórum liðum í fjórðu deildinni á næstu leiktíð Íslandsmóts skákfélaga. Mikill metnaður og tilhlökkun er meðal félagsmanna til að efla starfið á fleiri sviðum enda horfir vænlega um samvirkni og samlegðaráhrif. Ein veigamesta forsendan við sameiningu félaga almennt er að menning og bragur þeirra séu samstæð og eigi samleið.  Svo er í þessu tilviki þar sem bæði félögin leggja mikið upp úr nálægð, persónulegri vináttu og svolítið heimilislegum brag, auk áherslu á fræðslustarf á skemmtilegum  nótum.

 

Frekari fréttir af samruna og starfsemi Goðans-Máta verða birtar á heimasíðu félagsins og hér á síðunni skák.is eftir því sem málum vindur fram og vetrarstarfið tekur á sig gleggri mynd.